काठमाडौँ । नेपाल कम्युनिष्ट पार्टी ,नेकपा माओवादी केन्द्र , नेकपा (एकीकृत समाजवादी) र नेपाल समाजवादी पार्टीसम्मिलित समाजवादी मोर्चा नेपालको पूर्व राजावादी समूहबाट भएको क्षतिको उनिहरुवाटै असुल उपर गरी न्याय दिलाउन सरकारसंग माग गर्ने भएको छ। मोर्चाको आज नेकपा माओवादी केन्द्रको केन्द्रिय कार्यालय पेरिसडाँडामा बसेको बैठकले उक्त निर्णय गरेको नेपाल कम्युनिस्ट पार्टीका प्रवक्ता तथा समाजवादी मोर्चा नेपालका सदस्य सचिव प्रकाण्ड सीले जानकारी दिए।
नेता प्रकाण्ड सीका अनुसार नेकपा महासचिव विप्लवको अध्यक्षतामा सम्पन्न भएको उक्त बैठकले पूर्व राजावादी समूहबाट भएको क्षति असुल उपर गरी न्याय दिलाउन प्रधानमन्त्रीलाई ज्ञापन पत्र दिने निर्णय गरेको छ । उनले भने -‘ जसले गराएको हो उसैबाट पीडितलाई क्षतिपूर्ति भराउनुपर्ने बैठकले निर्णय गरेको छ। बैठकले जनतालाई सचेत गराउने, युवाहरूलाई संगठित गरेर क्रान्तिको उपलब्धिलाई उल्टाउनेविरुद्ध परिचालन गर्ने निर्णयसमेत गरेको छ ।’

त्यसैगरी मोर्चाको उक्त बैठकले गणतन्त्र रक्षाका लागि सबै गणतन्त्र पक्षधरबीच राजनीतिक अन्तरक्रिया गर्ने, जनतालाई जागरुक बनाउने, सचेत बनाएर युवाहरुलाई परिचालन गर्ने निर्णय समेत गरेको बताउदै नेता प्रकाण्ड सीले भने- ‘दरबारीयको आततायी रोक्न त्यसदिन समाजवादी मोर्चाको महत्त्वपूर्ण भूमिका रहेको छ । तीनकुनेको घटना नियोजित रूपमा भएको छ । संघीय लोकतान्त्रिक गणतन्त्र विदेशी प्रतिक्रियावादी र देशका प्रतिगामी तत्त्वहरूलाई पनि मन परेको छैन । यसको सशक्त प्रतिवाद गर्नुपर्छ भनेर बैठकले निर्णय गरेको छ। हिजो सिंहदरबारमा भएको गणतन्त्रपक्षधरको धारणा गणतन्त्रको रक्षा गर्नुपर्छ भन्ने हिसाबले आएको थियो तर घटनालाई हेर्ने सन्दर्भमा सरकारको कमजोरी रहेको देखियो । आगामी दिनमा पनि यस्ता घटना हुनसक्छ, सरकारलाई यसबारेमा ध्यानाकर्षण गराउन बैठकले डेलिगेसन गर्ने निर्णय गरेको छ ।’