२०८२ बैशाख १५ गते, सोमबार

काठमाडौँ । नेपाल कम्युनिस्ट पार्टीका महासचिव तथा समाजवादी मोर्चा नेपालका संयोजक विप्लव सीको ललितपुर महानगरपालिका वडा नम्बर २८ स्थित निवास परिसर युवाहरूको श्रम र सिर्जनाको केन्द्र बनेको छ। करिब दुईवटा अस्थायी संरचना रहेको ६ रोपनी क्षेत्रफलको जग्गामध्ये ३ रोपनीमा यहाँका युवा कार्यकर्ताहरूले व्यावसायिक तरकारी खेती गरेर उदाहरणीय कार्य गरिरहेका छन्। यो पहल न केवल उनीहरूको आत्मनिर्भरताको यात्रा बनेको छ, बरु व्यावसायिक कृषिको माध्यमबाट देशमै भविष्य खोज्ने युवाहरूका लागि प्रेरणाको स्रोत पनि बनेको छ।
यस उत्पादनमूलक कार्यमा सक्रिय युवा सगरमाथा सी आफ्नो अनुभव सुनाउँदै भन्छन्, “हामी युवाहरू प्रायः विदेशमा मात्रै अवसर देख्छौँ। तर मलाई त्यस्तो लाग्दैन। यो देशमै अथाह सम्भावना छ। हामीले त्यसलाई चिन्न र काम गर्न सक्नुपर्छ।” सगरमाथा सीको यो भनाइले युवाहरूको सोचमा सकारात्मक परिवर्तन ल्याउन र स्वदेशमै केही गर्ने भावनालाई बल प्रदान गरेको छ।
पार्टीका केन्द्रीय सदस्य तथा यस उत्पादन कार्यको नेतृत्व गरिरहेका कुँवर सीले यस प्रयासको महत्त्वबारे जानकारी दिँदै भने, “हाम्रो मुख्य उद्देश्य पार्टीका कार्यकर्ताहरूलाई उत्पादनसँग जोड्नु हो। आत्मनिर्भरताको सुरुवात गर्दै उनीहरूलाई व्यावसायिक कृषितर्फ उन्मुख गराउनु हो।” गएको वर्ष यसै ठाउँमा आलु, मुला, साग र काउली जस्ता तरकारीहरू उत्पादन गरी १० हजार रुपैयाँ आम्दानी भएको थियो। यस वर्षको सुरुवात उत्साहजनक रहेको छ। फर्सी, काँक्रो, लसुन, बोडी र कुरिलो जस्ता तरकारीहरू अहिले बजारमा पुग्न थालिसकेका छन्।
विप्लव सीको निवासलाई नै उत्पादनको केन्द्रको रूपमा विकास गरेर युवाहरूले सामूहिक भावनाका साथ काम गरिरहेका छन्। यसले न केवल उनीहरूको आर्थिक अवस्थामा सुधार ल्याएको छ, बरु कृषि क्षेत्रमा युवाहरूको सक्रियता र सम्भावनालाई पनि उजागर गरेको छ। यो पहल अन्य युवाहरूका लागि पनि एउटा प्रेरणाको स्रोत बन्न सक्छ, जसले विदेशमा मात्र नभई आफ्नै गाउँठाउँमा पनि उद्यमशीलता र आत्मनिर्भरताको बाटो खोजिरहेका छन्। – समर झुसे