२०८२ असार १३ गते, शुक्रबार

काठमाडौँ । नेपाल कम्युनिस्ट पार्टी ले ‘आत्मनिर्भर पार्टी, आत्मनिर्भर नेता-कार्यकर्ता हुँदै ‘आत्मनिर्भर देश’ को लक्ष्यका साथ देशभर ‘उत्पादन अभियान’ लाई तीव्रता दिएको छ। असार १० गतेबाट सुरु भएको यो अभियान आगामी साउन १० गतेसम्म चल्नेछ, जसमा पार्टीका सबै तहका नेता-कार्यकर्ताहरू खेतबारीदेखि खलिहानसम्म सक्रिय रूपमा संलग्न छन्।
पार्टी महासचिव विप्लव सीले यस अभियानलाई पार्टीको आन्तरिक आत्मनिर्भरताका साथै समग्र देश र जनतालाई आत्मनिर्भर बनाउने बृहत्तर लक्ष्यका साथ अगाडि बढाइएको बताएका छन । उनका अनुसार, यो केवल पार्टीको मात्र नभई, देश र जनताको साझा अभियान हो, जसको मूल लक्ष्य देशलाई खाद्यान्नमा आत्मनिर्भर बनाई नेपाली जनतालाई स्वाभिमानी र स्वाधीन जीवनयापन गर्न सक्ने बनाउनु हो
नेकपाले ‘आत्मनिर्भर पार्टी, आत्मनिर्भर नेता-कार्यकर्ता’ को वैचारिक जग निर्माण गरी यसलाई व्यवहारमा उतारेको केही समय भइसकेको छ। यसैको निरन्तरता स्वरूप, वर्तमान उत्पादन अभियानलाई अझ सशक्त बनाइएको छ। पार्टीको स्थायी समिति, पोलिटब्युरो र केन्द्रीय समितिको नेतृत्वमा देशभरका नेता-कार्यकर्ताहरू उत्साहका साथ यस अभियानमा होमिएका छन्।
गत वर्षको अनुभवलाई आधार मान्दै, यस वर्ष ५० प्रतिशतले बढी उत्पादन हुने आकलन गरिएको छ। गए वर्ष नै खाद्यान्नमा लगभग आत्मनिर्भर भइसकेकोले, यस वर्ष उपभोक्तासम्म धेरै परिमाणमा उत्पादन पुर्‍याउन सकिने विश्वास पार्टीले व्यक्त गरेको छ।
महासचिव विप्लव सी स्वयं पनि विगतदेखि नै कृषि उत्पादनमा सक्रिय रूपमा सहभागी हुँदै आएका छन । उनले अर्घाखाँचीको मान्द्रेमा अकबरे खुर्सानी खेती, जुम्लामा स्याउ खेती र भेडापालन लगायतका अभियानमा प्रत्यक्ष संलग्न भई पार्टीले देशभर करिब १२० बिघा जग्गा भाडामा लिएर विभिन्न किसिमका खेतीहरू गरिरहेको छ। जुम्ला लगायत हिमाली भेगमा स्याउ खेती, पहाडी भेगमा फलफूल र तरकारी खेती, र तराईमा धान तथा गहुँ खेतीलाई प्राथमिकता दिइएको छ।
यो अभियानमा इमान्दार कर्मचारी, व्यवसायी र राज्यका असल प्रतिनिधिहरूले पनि सौहार्दपूर्ण सहयोग उपलब्ध गराएकोमा नेकपाले धन्यवाद ज्ञापन गरेको छ। यसले समाजका विभिन्न वर्गको साथ र सहयोगले मात्र कुनै पनि अभियान सफल हुन सक्छ भन्ने सन्देश दिएको छ।
महासचिव विप्लव सीले आफ्नो भनाइमा स्पष्ट पार्नुभएको छ कि यदि राज्यले सही मार्ग देखाउने हो र जनताले विश्वासका साथ काम गर्ने हो भने, नेपालीहरूले खान-लाउनका लागि विदेशी भूमिमा भौतारिनुपर्ने छैन। बरु, आफ्नै देशमा उच्च स्वाभिमानका साथ बस्न र देशलाई आत्मनिर्भर तथा समृद्ध बनाउन सकिनेछ। “‘आत्मनिर्भरता नै देशको स्वाधीन एवं स्वाभिमानी भविष्य हो,'” उनको यो भनाइले अभियानको दीर्घकालीन दृष्टिकोणलाई स्पष्ट पार्दछ।
यो उत्पादन अभियानले केवल आर्थिक लाभ मात्र नभई, नेता-कार्यकर्ताहरूमा फरक उत्साह, आत्मविश्वास, स्वाभिमान र प्रतिबद्धता पैदा गरेको पार्टीको दाबी छ। यसले श्रम संस्कृतिको विकास गर्दै पार्टीलाई जनस्तरमा जोड्न मद्दत पुर्‍याएको छ। नेकपाको यो उत्पादन अभियानले नेपाललाई कृषिमा आत्मनिर्भर बनाउने र विदेशी परनिर्भरता घटाउने दिशामा एउटा महत्वपूर्ण कदम चालेको छ। महासचिव विप्लव सीले जनसमुदायलाई एकताबद्ध भई देशको नयाँ भविष्य निर्माणमा सहभागी बन्न आह्वान गरेका छन ।