२०७० पुष १३ गते, शनिबार

काठमाडौं, १३ पौष । नेकपा–माओवादीका सचिव देव गुरुङले ४ राजनीतिक दलसँग वार्ताको सम्भावना क्षीण बन्दै गएकाले आन्दोलनको विकल्प नभएको बताएका छन् । क्रान्तिकारी पत्रकार महासंघ लमजुङले आज गरेको पत्रकार भेटघाटमा नेता गुरुङले अहिलेको संविधानसभा निर्वाचनको कुनै औचित्य नभएको बताए ।
औचित्य नभएको संविधानसभाले जारी गरेको संविधानको पनि औचित्य नहुने भएकाले आफूहरुले त्यसलाई नमान्ने उनले बताए ।
सार्वभौम सम्पन्न अधिकारसहितको संविधान अहिलेको आवश्यकता रहेको भन्दै गुरुङले विदेशीको इशारामा बन्ने संविधान मान्य नहुने र यसका लागि सडक आन्दोलन गर्ने चेतावनी दिए । अहिलेको अवस्था २०४८ सालको भन्दा फरक नभएको र राजनीतिक दलका नेताहरुले २०४७ सालको संविधानलाई ब्युताउँन खोजेको आरोप समेत गुरुङले लगाए ।