२०७५ भाद्र १३ गते, बुधबार

काठमाडौं, १३ भदौ । प्रा. डा. गोविन्द केसीले राष्ट्रिय चिकित्सा शिक्षा विधेयकलाई तोडमोड गरिए फेरि अनशन बस्ने चेतावनी दिएका छन् । उनले आज सिंहदरबारमा बसेको प्रतिनिधिसभाअन्तर्गत्को शिक्षा तथा स्वास्थ्य समितिको बैठकपछि चिकित्सा शिक्षा विधेयकलाई तोडमोड गरी माफिया र नेतामुखी बुँदा थपिए फेरि अनशन बस्ने चेतावनी दिएका हुन् । उनले आफू चिकित्सा शिक्षालाई सस्तो, निःशुल्क, गुणस्तरीय र समान पहुँच बनाउन लड्दै आएको बताउँदै सम्झौता भइसकेको विधेयकमा तल–माथि भए आमरण अनशन बस्ने चेतावनी दिए । सम्झौता भइसकेको विषयमा छलफल नै आवश्यक नरहेको भन्दै सोही विषयमा छलफल गर्न बोलाइएकामासमेत डा. केसीले असन्तुष्टि व्यक्त गरे ।