२०८० पुष २९ गते, आईतवार

काठमाडौँ । अक्युपाई टुँडिखेलले खुलामञ्चमा कुनै पनि भौतिक संरचना नबनाउन काठमाडौं महानगरपालिकालाई आग्रह गरेको छ। अक्युपाई टुँडिखेल अभियानका संयोजक विजय श्रेष्ठले विज्ञप्ति जारी गरी खुलामञ्चमा दुई वटा फूटबल मैदान बनाउने महानगरको तयारीप्रति ध्यानाकर्षण भएको जनाउदै भौतिक संरचना निर्माण नगरी खुलामञ्चलाई खुला नै राख्नुपर्नेमा जोड दिएका छन ।
अभियानका संयोजक विजय श्रेष्ठले जारी गरेको विज्ञप्तिमा भनिएको छ – ‘जनताले ऐतिहासक समयकालदेखि आफ्नो हकअधिकारका लागि आवाज उठाउने खुला सार्वजनिक ठाउँ टुँडिखेललाई यथास्थितिमा जोगाएर राख्नुको कुनै विकल्प छैन। यस मैदान सम्पदामा कुनै प्रकारको निर्माण वा हस्तक्षेप नितान्त ग़लत हो। परापूर्वकालदेखि संरक्षित रहँदै आएको घाँसे मैदानलाई निरन्तरता दिएर हाल ताला लगाई रहेको खुलामञ्च जनताका लागि खुला गरी बच्चादेखि वृद्धसम्मका जनतालाई आवश्यकता अनुसारको क्रियाकलाप गर्न दिन स्थानिक सरकारलाई यस अक्युपाई टुँडिखेल अभियान अनुरोध गर्दछ।’
खुलामञ्चमा फूटबल मैदान बनाउँदा लैनचौरकै अवस्था आउनेतर्फ सचेत गराइएको छ। भूकम्प तथा प्राकृतिक प्रकोपको दृष्टिकोणले समेत खुलामञ्चको संरक्षण गर्नुपर्ने उल्लेख गर्दै अभियानले भनेको छ- ‘खुलामञ्च नागरिकका लागि खुला रहँदा नै बहुप्रयोजन र आफ्नो नयाँ कुरा सिर्जना गर्न सक्ने, पोख्न सक्ने थलो बन्न सक्छ। अन्यथा खुलामञ्चले लैनचौरको कृत्रिम फूटसल पार्क र त्यहाँको स्थानीयले जस्तै दुर्गति भोग्नुपर्ने कुरा समेत स्मरणयोग्य छ।’

खुलामञ्चमा फूटबल मैदान बनाउन खोजिए संघर्षमा उत्रिने अभियानले जनाएको छ। अभियानले भनेको छ- ‘टुँडिखेलको अभिन्न अंग रहेको खुलामञ्चमा केही निर्माण गर्नुभन्दा व्यवस्थापनमा जोड दिन अनुरोध गर्दछौं।’