२०८१ जेष्ठ १५ गते, मंगलवार

काठमाडौँ । जनपत्रकार संगठन नेपालले पत्रकार महासंघलाई मर्यादा, विश्वसनियतालाई कायम राख्न आग्रह गरेको छ। जनपत्रकार संगठन नेपालका केन्द्रीय अध्यक्ष शेरबहादुर विश्वकर्माले एक प्रेस विज्ञप्ति जारी गर्दै सो आग्रह गरेका हुन्।
अध्यक्ष विश्वकर्माले पत्रकार महासंघको आसन्न निर्वाचनको पूर्वसन्ध्यामा पत्रकारहरुका विभिन्न संघ संगठनहरुले गरिरहेका विभिन्न गतिविधि र महासंघका कामहरुबारे आफ्नो संगठनको गम्भीर ध्यानाकर्षण भएको जनाएका छन ।
जनपत्रकार संगठनले महासंघको जेठ २६ गतेका लागि घोषणा गरिएको निर्वाचन निर्धारित समयभित्र गरिनु पर्ने, निर्वाचनलाई कुनैपनि बहानामा सार्ने प्रयास गरिन नहुने, पत्रकार महासंघ जस्तो नागरिक अगुवा संस्थाले आफ्नो मर्यादा, विश्वसनियता र मान्यतालाई कायम राख्न विधि विधानको पूर्णतः पालना गर्नु पर्ने भन्दै गम्भीर ध्यानाकर्षण गराएको छ ।
जनपत्रकार संगठनले पत्रकारिता र महासंघलाई मर्यादित, पेशागत र थप विश्वसनियता बनाउने उद्देश्यले सुरुवात गरिएको महासंघको शुद्धिकरण अभियान आफैमा सकरात्मक कदम भएको जनाएको छ । तर जारी विज्ञप्तिमा जनपत्रकार संगठनले भनेको छ ‘अब शुद्धिकरण मापदण्डको कार्यान्वयन हुनैपर्छ, विवादको उचित समाधान खोजिनु पर्छ । कुनैपनि वास्तविक पत्रकार सदस्यताबाट बञ्चित गरिनु हुदैन र गैरपत्रकारहरु महासंघमा रहनु हुदैन भन्ने मान्यतामा जनपत्रकार संगठन नेपाल दृढ रहको कुरा स्पष्ट गर्न चाहन्छ ।’
कतिपय शाखाहरुमा रहेको सदस्यता विवादका समस्याहरु अझै नटुङगिएको भन्दै संगठनले सदस्यता प्राप्ति सम्वन्धि महासंघको विधानको व्यवस्था बमोजिम पत्रकारहरुले सदस्यता र मतदानको अधिकार पाउनु पर्ने उल्लेख गरेको छ । संगठनले सबैको सहभागितलाई महासंघमा सुनिश्चित गर्न अपिल पनि गरेको छ ।
विज्ञप्तिको अन्तमा भनेको छ- ‘पत्रकार महासंघ हामी सबैको साझा संस्था हो भन्ने कुरालाई व्यावहारिकरुपमा अनुदित गर्न बैचारिक र संगठनात्मक हिसाबले सबै पेशागत संघ ÷संगठनको सहभागितालाई सुनिश्चितता गर्दै संस्थालाई थप गतिशिल र पूर्नसंरचना हुने गरी आगामी निर्वाचनको मुद्धा बनाउन सम्वन्धित सबैमा हार्दिक अपिल गर्दछौ ।’
स्मरणीय छ , गत शुक्रबार बसेको जनपत्रकार संगठन नेपालको सचिवालय बैठकले संगठनका पूर्वअध्यक्ष प्रकाश डुम्रेको नेतृत्वमा महासंघको निर्वाचनमा जाने निर्णय गरेको थियो । बैठकले निर्वाचनमा एलायन्सका लागि अरु संगठनहरुसँग छलफल गर्न अध्यक्षको नेतृत्वमा कार्यदलसमेत गठन गरेको र उक्त कार्यदलमा उपाध्यक्ष जानकारी चौधरी र सल्लाहकार राजेन्द्र चिमौरियालगायत रहेका छन् ।