२०८२ भाद्र १४ गते, शनिबार

काठमाडौँ । प्रधानमन्त्री के.पी. शर्मा ओली पाँच दिने औपचारिक भ्रमणका लागि आज चीन प्रस्थान गरेका छन् । तियानजिनमा हुने सांघाई सहयोग संगठन (एससीओ) को शिखर सम्मेलनमा सहभागी हुन ओली आज बिहान ७ बजे चीनतर्फ प्रस्थान गरेका हुन् ।
भ्रमणका क्रममा प्रधानमन्त्री ओलीले चीनका राष्ट्रपतिसहित सम्मेलनमा सहभागी हुन आएका ६ देशका सरकार प्रमुखसँग द्विपक्षीय वार्ता गर्ने तय भएको छ ।
ओलीले चीनका राष्ट्रपति सी जिनपिङसँग तियानजिनमा भेटघाट गर्ने छन् । उनले भदौ १६ गते तियानजिनमा हुने एससीओ प्लस शिखर सम्मेलनलाई सम्बोधन गर्ने कार्यक्रम छ ।
भ्रमण टोलीमा प्रधानमन्त्री पत्नी राधिका शाक्य, पूर्व उपप्रधानमन्त्री एवं प्रतिनिधिसभा सदस्य पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री एवं प्रधानमन्त्रीका आर्थिक तथा विकास सल्लाहकार डा युवराज खतिवडा, पूर्वमन्त्री एवं प्रतिनिधिसभा सदस्य छविलाल विश्वकर्मा र नेपाल सरकारका उच्चपदस्थ कर्मचारीहरू सहभागी छन् ।
प्रधानमन्त्री ओलीले भ्रमणका क्रममा नेपालको लिम्पियाधुराबाट भारत—चीनले व्यापार मार्ग खोल्न गरेको सम्झौताबारे आवाज उठाउने बताएका छन् ।
प्रधानमन्त्री ओली भदौ १८ गते स्वदेश फर्किने तालिका छ ।