२०८२ भाद्र १५ गते, आईतवार

काठमाडौँ । चीनको पाँच दिने भ्रमणमा रहेका प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच भेटवार्ता नहुने भएको छ ।
प्रधानमन्त्री ओलीको भ्रमण तालिकामा मोदीसँगको भेट नपरेको जानकारी प्रधानमन्त्रीको सचिवालयले दिएको छ । चीनको तियानजिन सहरमा आयोजना हुने २५औं शाङ्घाई सहयोग संगठन (एससीओ) शिखर सम्मेलनमा सहभागी हुन प्रधानमन्त्री ओली शनिबार चीन पुगेका हुन् । सोही दिन उनले चिनियाँ राष्ट्रपति सी चिनफिङसँग द्विपक्षीय भेटवार्ता गरेका थिए । सो अवसरमा प्रधानमन्त्री ओलीले भारत–चीनबीच लिपुलेकलाई व्यापारिक मार्गका रूपमा प्रयोग गर्ने सहमतिप्रति नेपालको गम्भीर आपत्ति जनाएका थिए ।
भ्रमण टोलीमा रहेका पत्रकार प्रकाश सिलवालका अनुसार, प्रधानमन्त्री ओली र भारतीय समकक्षी मोदीबीच चीनमा भेटवार्ता हुने तालिका तय भइसकेको छैन । “भारत भ्रमण तय भइसकेको अवस्थामा चीनमा ओली र मोदीबीच औपचारिक भेटवार्ताको कार्यक्रम छैन,” उनले जानकारी दिए ।
यसैबीच, चिनियाँ राष्ट्रपति सी चिनफिङसँग प्रधानमन्त्री ओलीपछिको चरणमा भारतीय प्रधानमन्त्री मोदीले भेट गर्ने कार्यक्रम रहेको भारतीय सञ्चारमाध्यमले जनाएका छन् । मोदीको यो चीन भ्रमण २०२० मा गलवानमा भएको सैन्य झडपपछि पहिलोपटक भएको हो । भ्रमणको उद्देश्य भारत–चीन सीमासम्बन्धी विवाद न्यून पार्ने रहेको बताइएको छ ।
एससीओ शिखर सम्मेलनमा नेपाल, भारत, चीनसहित २० भन्दा बढी राष्ट्र सहभागी छन् ।