२०८२ मंसिर ८ गते, आईतवार

काठमाडौँ । सर्वोच्च अदालतले प्रधानमन्त्री सुशीला कार्कीसँग अदालतको अवहेलनामा किन कारबाही नगर्ने भनी लिखित जवाफ माग्ने आदेश गरेको छ । प्रधानमन्त्री कार्कीविरुद्ध अधिवक्ता डा.प्रेमराज सिलवाल र प्रतिभा उप्रेतीले अदालतको अवहेलना मुद्दा दायर गरेका थिए । उक्त मुद्दा न्यायाधीशद्वय हरिप्रसाद फुयाल र अव्दुल अजीज मुसलमानको संयुक्त इजलासमा सुनुवाइ भएको थियो ।
मुद्दाको सुनुवाइ गर्दै न्यायाधीशद्वय फुयाँल र मुसलमानको इजलासले प्रधानमन्त्री कार्कीसँग लिखित जवाफ माग्ने आदेश गरेको हो । पूर्व प्रधानन्यायाधीशसमेत रहेकी प्रधानमन्त्री कार्कीलाई ‘तपाईँलाई अदालतको अवहेलना मुद्दामा कारबाही किन नगर्ने ?’ भनी लिखित जवाफ माग गरिएको हो । विभिन्न ११ देशका राजदूत फिर्ता बोलाउने सरकारको निर्णयविरुद्ध परेको रिटमा सर्वोच्चले अन्तरिम आदेश जारी गर्दै राजदूत फिर्ता बोलाउने निर्णय कार्यान्वयन नगर्न भनेको थियो । सर्वोच्चको आदेशलगत्तै सरकारले ती देशका राजदूतहरुलाई परराष्ट्र मन्त्रालयमा हाजिर हुनेगरी फर्किन पत्राचार गरेको थियो । अहिले ती राजदूतहरु दैनिक परराष्ट्रमा पुगेर हाजिर गरी घर फर्किन गर्छन् ।