२०७० जेष्ठ ३० गते, बिहीबार

रामेछाप गुन्सी–९ गुन्सालका चार वर्षीय बालकले डोजर चलाएर सबैलाई आश्चर्यमा पारेका छन् । हाल काठमाडौको एक विद्यालयमा एलकेजीमा अध्ययन गरिरहेका चार वर्षीय सुजल घिसिङले हेभ्भी डोजर हसजै चलाएर आफ्नो प्रतिभा प्रदर्शन गरेका हुन् । उनी सानै उमेरमा डोजर चलाएर गिनिज बुक अफ वर्ल्ड रेकर्डस्मा नाम लेखाउन चाहन्छन् ।
बालबालिकासम्बन्धी काम गर्ने संस्थाहरु बालश्रमविरुद्धको अन्तर्राष्ट्रिय दिवस मनाउन व्यस्त थिए । बालश्रमविरुद्ध ठुला र चिल्ला वक्तव्यवाजी भइरहेको थियो । तर, रामेछापका चार वर्षीय बालकले भने राजधानीको अन्तर्राष्ट्रिय विमानस्थल नजिक डोजर चलाएर सबैलाई आश्चर्यमा पारिरहेका थिए । चार वर्ष २ महिनाका यी बालकले सहजै डोजर चलाएको हेर्नेहरुको पनि ताँती लागेको थियो ।
रामेछाप गुन्सी–९ गुन्सालका ४ वर्षीय सुजल घिसिङले यसरी बडेमानको डोजर चलाएका हुन् । चालकको सिटमा राम्रोसँग बस्न पनि नसक्ने र बोल्न पनि नसक्ने सुजलको यो प्रतिभाले सबैलाई आश्चर्यमा पारेको थियो । चार वर्ष दुई महिना मात्र पार गरेका सुजलले एकीकृत माओवादीका केन्द्रीय सदस्य युवराज चौलागाईंलाई डोजरमा चढाएर यसरी सहजै डोजर चलाए ।
सुजल घिसिङ अहिले राजधानीको मेरील्याण्ड इंग्लिस स्कुलमा एलकेजीमा पढ्दै पनि छन् । आर्थिक अभावको जाँतोमा नराम्रोसँग पिधिएका सुजलका पिता सुभास घिसिङ चालक हुन् । सुजलकी आमा एलिसा गोले घिसिङ घरखेतकै काम व्यस्त रहन्थिन् । आमा मेलापात जाने भएकाले काभ्रेको सिपाघाटमा काम गर्दैगर्दा सुभासले छोरालाई पनि कार्यक्षेत्रमै लिएर जाने गरे । डोजर चलाउने क्रममा पनि तीन वर्षीय सुजलसँगै बस्थे । यत्तिकैमा एक दिन सुजलले डोजर चलाउन मन गरेको पिता सुभासले बताए । सुरुमा त असहज लागे पनि चालक सिटमा राखेपछि सुजलले सहजै डोजर चलाएपछि आफूसमेत आश्चर्यमा परेको सुभास बताउछन् ।
त्यसपछि छोराको प्रतिभा देखेर आफूले पनि प्रोत्साहन गरेको उनको भनाइ छ । राजधानीको गठ्ठाघर नजिकै उनले बुधबार पनि सहजै हेभी डोजर चलाएर देखाए । उनलाई चालक सिटसम्म पुग्न केही गठिन भयो । चाबी खल्तीमा हालेर चालक सिट उक्लेका उनले डोजर स्टार्ड गरे र फटाफाट अघि बढाए । निकै अघि बढाएपछि उनले ब्याक गियरमा डोजर पछाडि पनि पर्काए ।
यो सबै आफैले हेरेका एकीकृत माओवादीका केन्द्रीय सदस्य युवराज चौलागाईले आफू बालकको प्रतिभा देखेर प्रभावित भएको बताए । नेता चौलागाईले बालकको कक्षा १ देखि १२ सम्म निःशुल्क पढाउने व्यवस्था गर्ने घोषणा मात्र गरेनन्, गिनिज बुक अफ वर्ल्ड रेकर्डसमा नाम लेखाउन पहल गर्नेसमेत बताए । नेता चौलागाईले त्यसो भनिरहँदा अबोध बालक सुजल भने ताली बजाइरहेका थिए । आर्थिक अभावमा सञ्चार माध्यमसम्म पुग्न नसकेको भन्दै सुजलका पिता सुभास छोराको पढाईप्रति निकै चिन्तित थिए । त्यसैले उनले आफ्नो छोरा प्रतिभाशाली रहेको भन्दै उनको प्रतिभा गिनिज बुक अफ वल्र्ड रेकर्डसमा उल्लेख गराउन सहयोग गर्न आग्रह गरे । उनले आफूलाई छोराको पढाई र रेकर्डसबाहेक केही चाहना नरहेको पनि बताए ।
अन्तर्राष्ट्रिय बाल दिवस मनाइरहँदा बाल चालक सुजलले प्रदर्शन गरेको यो प्रतिभा अवलोकनीय थियो । तर, यस्ता प्रतिभाहरु अवसर र प्रोत्सहन अभावमा ओझेल पर्ने र हराउने गरेका छन् । र, गरिबी, अशिक्षा र अवसर अभावका कारण प्रतिभा बाल श्रमका रुपमा पनि परिणत हुने गरेको छ । नेपालमा अहिले पनि करिब १६ लाख बालबालिका श्रमिकका रुपमा काम गर्न बाध्य भएको श्रम बिभागको तथ्याङ्क छ । त्यसैले सुजलले जुन प्रतिभा प्रदर्शन गरेका छन् त्यसलाई प्रोत्साहन गर्नु आवश्यक छ । यसको अर्थ उनलाई अब्बल र दक्ष चालक होइन । उच्चशिक्षासहित उनलाई सम्बन्धित क्षेत्रमा केही अवसर प्रदान गर्नु राज्य र समाजको जिम्मेवारी र दायित्व हो ।