२०७० जेष्ठ ३१ गते, शुक्रबार

काठमाडौं, जेठ ३१– राजधानीको लैनचौरस्थित मल्ल क्यासिनोमा जुवा खेलिरहेको अवस्थामा चर्चित गायक यम बराललाई प्रहरीले पक्राउ गरी हिरासतमा राखेको छ । महानगरीय प्रहरी परिसर दरबारमार्गको टोलीद्वारा पक्राउ बराललाई हिरासतमै राखी कानुनी कारबाही अघि बढाइएको छ । नेपाली नागरिक जुवा खेलिरहेको गोप्य सूचनाका आधारमा गएको प्रहरी टोलीले उनलाई रंगेहात पक्राउ गरेको हो । पक्राउलगत्तै उनलाई दरबारमार्ग प्रभाग ल्याइएको थियो । क्यासिनोमा नेपालीलाई प्रवेश निषेध भएपनि नेपाली खेलाडीकै भरमा नेपालका क्यासिनो चलिरहेका छन् । पछिल्लो समयमा प्रहरीले यसमा कडाइ गरिरहेको छ । भारतीय र चिनियाँ नेपालका क्यासिनोका बढी ग्राहक हुन् । उनीहरुले मात्र क्यासिनो धान्न मुस्किल पर्ने हुँदा लुकाइछिपाइ नेपालीलाई खेलाउने गरिन्छ ।