२०७० आश्विन ७ गते, सोमबार

काठमाण्डौ, ७ असोज ।आज राष्ट्रिय संरक्षण दिवस विभिन्न कार्यक्रम गरी मनाइँदै छ । विसं २०६३ असोज ७ गते तत्कालीन वनमन्त्री गोपाल राई, वन र वातावरण क्षेत्रका विज्ञहरू डा. हर्क गुरुङ, डा. चन्द्र गुरुङलगायत २४ जनाको ताप्लेजुङको धुम्सामा हेलिकोप्टर दुर्घटनामा निधन भएपछि उहाँहरूको योगदानको स्मरण गर्दै असोज ७ गतेलाई राष्ट्रिय संरक्षण दिवसको रूपमा मनाउन थालिएको हो ।
इसैवीच दिवसकै अवसरमा विश्व वन्यजन्तु कोष -डब्लुडब्लुएफ)ले वन्यजन्तु, वन, वातावरण र जैविक विविधताको संरक्षणमा महत्वपूर्ण कार्य गर्ने र समाचार सम्प्रेषणको माध्यमबाट सहयोग पुर्‍याउने एक संस्था र पाँच व्यक्तिलाई राष्ट्रिय संरक्षण पुरस्कार २०१३ बाट सम्मान गर्दैछ ।
कोषले अब्राहम संरक्षण पुरस्कार संस्थागत रूपमा सुन्दरी सामुदायिक वन उपभोक्ता समूह नवलपरासीलाई, व्यक्तिगतरूपमा डा ईन्द्रप्रसाद सापकोटा र प्रकाश विकलाई, डब्लुडब्लुएफ संरक्षण मिडिया पुरस्कार पत्रकार पीताम्बर सिग्देललाई, विशेष संरक्षण पुरस्कार बर्दियाका समाजसेवी चन्द्रकला सुब्बा र युवा संरक्षण नेतृत्व पुरस्कार विकास पाठक क्षेत्रीलाई पुरस्कृत गर्न लागेको हो ।