२०७० माघ १० गते, शुक्रबार

काठमाण्डौ, १० माघ।आजवाट सहिद सप्ताह सुरु भएको छ ।मुलुकमा भएका राजनीतिक आन्दोलनका क्रममा आफ्नो जीवनको बलिदान गरेका सहिदहरुको सम्झनामा सहिद सप्ताह मनाउने गरिञ्छ । सहिदहरुको सम्झनामा प्रत्येक वर्ष माघ १० देखि १६ गतेसम्म सात दिन सहिद सप्ताह मनाउने गरिन्छ । सोही कार्यक्रम अनुसार शुक्रवारवाट सहिद सप्ताह सुरु भएको हो ।
माघ १० अर्थात आजकै दिन शुक्रराज शास्त्रीले अमरत्व प्राप्त गरेको स्थान टेकुको पचलीमा विशेष कार्यक्रम गरी श्रद्धाञ्जली दिइने कार्यक्रम रहेको छ । तत्कालीन जहानिया राणा शासकले विक्रम सवतं १९९७ माघ १० गते शुक्रराज शास्त्रीलाई टेकु पचलीस्थित रुखमा झुन्डाएर मृत्युदण्ड दिएको थियो ।
यस्तै माघ १३ गते सिफलमा धर्मभक्त माथेमा तथा माघ १५ गते दशरथ चन्द र गङ्गालाल श्रेष्ठलाई शोभाभगवतीमा गोली हानी मृत्युदण्ड दिइएको थियो । माघ १६ गते ज्ञात तथा अज्ञात सहिदप्रति श्रद्धाञ्जलि अर्पण गर्नका लागि लैनचौरस्थित सहिद स्मारकमा विशेष कार्यक्रम गरिने छ ।