सर्वोच्चमा तत्काल न्यायाधीश नियुक्त गर : बार
काठमाडौं, २१ माघ । सर्वोच्च अदालत बार एसोसिएसनका प्रतिनिधिहरुले हिजो साँझ प्रधानन्यायाधीश कल्याण श्रेष्ठसँग भेट गरी सर्वोच्च अदालतमा तत्काल न्यायाधीश नियुक्त गर्न आग्रह गरेका छन । मुद्दाको संख्या बढ्ने तर न्यायाधीश घट्दै जाने स्थितिले न्याय पाउने नागरिकको मौलिक हकमै प्रहार भएको भन्दै यो स्थिति अन्त्यका लागि तत्काल न्यायाधीश नियुक्ति गर्न उनीहरुले आग्रह गरेक हुन् ।
बारका प्रतिनिधिहरुले प्रधानन्यायाधीश श्रेष्ठलाई सुझावसहितको पत्रसमेत बुझाएका छन् । पत्रमा सर्वोच्च अदालतमा २२ हजारभन्दा बढी मुद्दा पुगेको तर सुनुवाईको पालै आउन नसकेको उल्लेख छ । यो भयावह स्थिति रोक्न न्यायाधीश नियुक्ति तत्काल गर्नैपर्ने र यसमा प्रधानन्यायाधीशको अग्रसरता हुनै पर्ने पत्रमा उल्लेख छ । सर्वोच्च अदालतमा हाल १० जना न्यायाधीश छन् ।