२०७३ बैशाख १४ गते, मंगलवार

काठमाडौ, १४ बैशाख । सप्तरीको दिघवा गाविसमा भीषण आगलागी हुँदा १५ घर जलेर नष्ट भएका छन् । सर्युग भगतको घरबाट अचानक सल्केको आगो तत्काल नियन्त्रण गर्न नसकिएपछि नजिकका अन्य घरसमेत जलेर नष्ट भएका हुन् ।
आगलागीबाट करिव ५० लाख रुपैयाँ बराबरको क्षति भएको सप्तरी प्रहरीले जनाएको छ । राजविराज नगरपालिकाबाट पुगेको बारुण यन्त्र, स्थानीयवासी, प्रहरी र सेनाको सहयोगमा ३ घण्टापछि आगो नियन्त्रणमा लिइएको थियो । एक महिनायता सप्तरीका विभिन्न ठाउँमा भएको आगलागीमा १ सय ७ घर नष्ट भएको जिल्ला प्रहरी कार्यालयले जनाएको छ ।