२०७३ असार ९ गते, बिहीबार

काठमाडौं, ९ असार । प्रहरीले काठमाडौंको बिजुलीबजारबाट गुन्डागर्दीमा संलग्न जसवन्त राई भनिने कर्ण गुरुङलाई विहीबार दुई राउन्ड गोली प्रहार गरी नियन्त्रणमा लिएको छ । प्रहरीले हानेको गोली गुरुङको दाहिने खुट्टाको तिघ्रा र पिँडुलामा लागेको छ । वीर अस्पतालमा उपचार गराइरहेका गुरुङको अवस्था खतरामुक्त रहेको बताइएको छ ।
विगत लामो समयदेखि काठमाडौंको टेकु, कालीमाटी, कलंकीलगायतका क्षेत्रमा गुन्डागर्दीमा संलग्न रहेका गुरुङलाई नियन्त्रणमा लिनेक्रममा प्रहरीमाथि उनले फलामको रड प्रहार गर्न खोजेपछि बाध्य भएर गोली चलाउनुपरेको प्रहरीको भनाइ छ । गुरुङविरुद्ध ज्यान र केही सार्वजनिक मुद्दा चलिरहेको पनि प्रहरीले जनाएको छ । उनी फरार अभियुक्तको सूचीमा रहेका थिए । केही दिनअघि काठमाडौंको कालीमाटी क्षेत्रमा हप्ता असुली गर्नेक्रममा उनले केही स्थानीय व्यापारीहरुमाथि कुटपिटसमेत गरेको बताइएको छ ।