२०७३ आश्विन १० गते, सोमबार

काठमाडौँ, १० असोज । पूर्व गृहमन्त्री माधव घिमिरे चढेको जीप आइतबार अपराह्न त्रिशुली नदीमा खस्दा तीन जनाको मृत्यु भएको छ भने घिमिरेसहित तीन जना भने नदीमा वेपत्ता भएका छन् । वेपत्ता भएकाहरुको खोजी आज विहानैदेखि फेरि थालिएको छ । खोजीमा नेपाली सेना, सशस्त्र प्रहरी र नेपाल प्रहरी परिचालन गरिएको छ । मुग्लिन र कुरिनटारको बीचमा पर्ने घोप्टेभीरबाट घिमिरे चढेको बा ९ च १५३१ नम्बरको स्कार्पियो जीप नदीमा खसेको थियो ।
दुर्घटनामा घिमिरेकी आमा चैतन्या, सुरक्षा गार्ड सशस्त्र प्रहरीका सहायक निरीक्षक रामचन्द्र कार्की र घिमिरका आफन्त नारायण काफ्लेको मृत्यु भएको हो ।
वेपत्ता हुनेमा पूर्व गृहमन्त्री घिमिरे, उनका दुई भाई मोहन र प्रकाश घिमिरे छन् । प्रकाश घिमिरे राष्ट्रिय खेलकुद परिषदको प्रतियोगिता बिभाग प्रमुख हुन् ।
गाडीका चालक विष्णु राईलाई गम्भीर घाइते अवस्थामा उद्धार गरी उपचारका लागि भरतपुर लगिएको कुरिनटारस्थित सशस्त्र प्रहरीका एसपी गणेशबहादुर थापाले जानकारी दिए । उनीहरु मुक्तिनाथ गएर काठमाडौं फर्कंदै थिए । पूर्व मूख्य सचिवसमेत रहेका माधव घिमिरे २०६९ सालमा गठीत खिलराज रेग्मी सरकारमा गृहमन्त्री थिए ।