२०७४ माघ २१ गते, आईतवार

काठमाडौं, २१ माघ । गत असारमै बनाइसक्नुपर्ने पुल निर्माण अझै अधुरो हुदा जुम्लाको गोठीचौर गाउँपालिका र डोल्पाका स्थानीयले सास्ती व्यहोर्नु परेको छ । जुम्ला–डोल्पा सडक खण्डअन्तर्गत तिला नदी र जवा नदीमाथि बन्न लागेको ८४ मिटर पक्की पुल सम्झौता सकिँदा पनि बनेको छैन । चार करोडको लागतमा २०६७ सालबाट थालिएको पुलको काम अझै नसकाइएको हो । पुल नबन्दा जुम्लाको गोठीचौर गाउँपालिका र डोल्पाका स्थानीयलाई दैनिक उपभोग्य वस्तु ढुवानी गर्नसमेत कठीन भएको छ । राज्यले कर्णालीलाई शदीयौंदेखि सौतेनी व्यवहार गर्दै आएको स्थानीय गुनासो गर्छन् ।
डोल्पाबासीले कहिले गाडी देख्न पाउने हो जवाफ दिन उनीहरु सरकारसँग आग्रह गर्दछन् । सात वर्ष हुँदा पनि पुल सम्पन्न नगरेकामा स्थानीय रुष्ट बनेको लालभक्त बोहोरा बताउँछन् । स्थानीय जग्गाधनीले काममा अवरोध गरेपछि कामले गति लिन नसकेको ठेकेदार तारासिंह कठायतको तर्क छ । एक हप्ताको पैदल यात्रा गरेर डोल्पाबासी जुम्लामा खाद्य वस्तुलगायत दैनिक उपभोग्य सामान जोहो गर्न जुम्ला आउनु पर्ने बाध्यता रहेको छ ।