महाकाली राजमार्ग अवरुद्ध

२०७५ श्रावण ९ गते, बुधबार

काठमाण्डौ, ९ साउन । गएराति परेको पानीका कारण पहिरो खस्दा महाकाली राजमार्गको सतबाँझ– गोकुलेश्वर सडकखण्ड सडक अवरुद्ध भएको छ । बांगाबगरमा माथिबाट आएको पहिरोका कारण गएराति देखि नै सडक अवरुद्ध हुँदा यातायात पूर्ण रुपमा बन्द भएको जिल्ला प्रहरी कार्यालय बैतडीका प्रवक्ता प्रहरी निरीक्षक कान्तिराज जोशीले जानकारी दिए ।
अवरुद्ध सडक खुलाउने प्रयास भईरहे पनि लगातार पानी परिरहेकोले समस्या भएको बताईएको छ । अपरान्हसम्म सडक पुनः सञ्चालनमा आउने प्रहरीले जनाएको छ । सडक अवरुद्ध हुँदा काठमाडौं, महेन्द्रनगर, धनगढी, डडेल्धुरा, दार्चुला, बैतडी सदरमुकामका लागि छुटेका तथा जिल्ला भित्रिन लागेका यात्रु अलपत्र परेका छन् । विसं. २०६० साल असारमा आएको पहिरोको व्यवस्थापन तथा सडक मर्मत राम्रोसँग नहुँदा बर्षाको समयमा प्रत्येक बर्ष उक्त ठाउँमा बेलाबेलामा सडक अवरुद्ध हुने गरेको छ ।

प्रतिक्रियाहरु

[anycomment]