२०७५ कार्तिक ६ गते, मंगलवार

काठमाडौं, ६ कात्तिक । जिल्ला प्रशासन कार्यालय धनुषामा कार्यरत शसस्त्र प्रहरी सहायक हवलदार चन्देश्वर गिरीलाई अख्तियार दुरुपयोग अनुसन्धान आयोगले रंगेहात नियन्त्रणमा लिएको छ । उनलाई भारतीय बजारबाट अबैध रुपमा भित्रिने मालसमान ओसारपोसारमा सहज बनाई दिने भन्दै घुस लिइरहेको अवस्थामा रंगेहात नियन्त्रणमा लिएको हो । अख्तियार दुरुपयोग अनुसन्धान आयोग, बर्दिबास, महोत्तरीका प्रकाश मैनालीको नेतृत्वको टोलीले गोप्य सूचनाको आधारमा नगद ११ हजार घुससहित जनकपुरको कदम चोकबाट नियन्त्रणमा लिएको हो ।
भारतीय बजारबाट घरायसी तथा किरानाका मालसमान धनुषा भित्र्याउनमा सहज बनाइदिने भन्दै ब्यापारीबाट घुस लिएको अख्तियार टोलीले जानकारी दिएको छ । स्थानीय सहरजमिन मुचुलकापछि गिरीलाई बर्दिबास लगिएको छ । गिरीमाथि थप अनुसन्धान सुरु गरिएको टोलीले बताएको छ ।