२०७७ भाद्र २ गते, मंगलवार

काठमाडौं । हुम्ला खार्पुनाथ गाउँपालिका– १ का वडाध्यक्ष मगुसिंह बुढालाई आफ्नै नागरिकता केरमेट गरी उमेर बढाएको आरोपमा प्रहरीले पक्राउ गरेको छ । महिला संघ जिल्ला अध्यक्ष विजया बुढाले वडाध्यक्षले किर्ते गरेको भन्दै उजुरी दिएपछि उनलाई प्रहरीले पक्राउ गरेको हो ।
खार्पुनाथ गाउँपालिका– १ गोप्कागाउँ बस्ने हाल सोही वडाको वडाध्यक्ष बुढाको जन्ममिति ०१० साल रहेको र निजले जिल्ला प्रशासन कार्यालय हुम्लाबाट मिति १ वैशाख ०४५ मा नागरिकता लिएका थिए । तर, उनी आफैँले मनोमानी नागरिकतामा केरमेट गरी जन्ममिति २००० साल बनाएर सच्चाएको उजुरीमा उल्लेख छ । उनीमाथि थप अनुसन्धान भइरहेको प्रहरीले जनाएको छ ।