२०७८ पुष १४ गते, बुधबार

काठमाडौं । आज बिहानैदेखि काठमाडौंसहित देशभर भइरहेको वर्षाका कारण काठमाडौंबाट हुने हवाई उडानहरु प्रभावित भएका छन् ।
रातिदेखि नै काठमाडौं उपत्यकासहित देशका अधिकांश स्थानमा पानी परिरहेकाले उडान प्रभावित भएको हो । एयरलाइन्स कम्पनीहरुले प्रतिकूल मौसम र कम भिजिबिलिटीका कारण उडानहरु प्रभावित भएको जानकारी दिएका हुन् । डोल्पा, लुक्ला, सिमिकोट लगायतका स्थानका सबै उडान रद्ध भएका छन् । विमानस्थल कार्यालयका अनुसार पोखरा र नेपालगन्जको मौसम खराब भएका कारण ती स्थानहरुमा पनि उडान हुन सकेको छैन । अन्य गन्तव्यको उडान पनि ढिलो भएको कार्यालयले जानकारी दिएको छ । सिमराबाट काठमाडौंका लागि उडेको एती एयरलाइन्सको एक जहाज मकवानपुर क्षेत्रको आकासमा केहीबेर फन्को मारेर काठमाडौं विमानस्थलमा अवतरण गरेको छ ।