२०७९ फाल्गुन १८ गते, बिहीबार

काठमाडौं । हेटौंडा–काठमाडौं जोड्ने कान्ति लोकपथमा बिहीबारदेखि चैत १० गतेसम्म सवारी साधन चलाउन रोक लगाइएको छ । सडक मर्मतको कामलाई छिटो सम्पन्न गर्न भन्दै दुईतर्फी सवारी संचालनमा रोक लगाइएको हो । कान्ति लोकपथमा आवागमन बन्द भएपछि हेटौंडा–काठमाडौं चल्ने सवारी साधनका लागि वैकल्पिक मार्ग तोकिएको छ । जसअनुसार हेटौंडाबाट काठमाडौं जान हेटौंडा–भीमफेदी–कुलेखानी–सिस्नेरी–दक्षिणकाली रूट हुँदै एकतर्फी यातायात सेवा सञ्चालन गर्ने र काठमाडौंबाट हेटौंडा जान थानकोट–चित्लाङ–मार्खु–कुलेखानी–भीमफेदी रूट हुँदै एकतर्फी सवारी सञ्चालन गरिने भएको छ ।

यता, पृथ्वी राजमार्ग अन्तर्गत तनहुँको दमौलीदेखि विमलनगरसम्मको सडकखण्ड बिहीबारदेखि राति चार घण्टा बन्द गरिने भएको छ । मुग्लिङ–पोखरा सडक विस्तार आयोजनाले भित्ता काट्नका लागि राति १२ बजदेखि बिहान ४ बजेसम्म दमौली–विमलनगर सडकखण्ड बन्द गर्न लागेको हो । भित्ता काट्न दश दिन लाग्ने अनुमान गरिएको छ । सो सडकखण्डमा डाइभर्सन बनाउने ठाउँ नभएकाले रातिको समयमा आवागमन रोकेर भित्ता काट्नु परेको आयोजनाले जनाएको छ । एसियाली विकास बैंकको ऋण सहयोगमा पोखरा–मुग्लिन सडक विस्तार तथा स्तरोन्नतीका काम भईरहेको छ ।