२०८१ जेष्ठ ३० गते, बुधबार

काठमाडौँ । गएराति रुपन्देहीमा बस दुर्घटना हुँदा ४३ जना घाइते भएका छन् । दाङबाट काठमाडौं आउँदै गरेको रा १ ख २७८३ नम्बरको बस गएराति ११:५० बजे रूपन्देहीको सैनामैना नगरपालिका- १० सालझन्डी बजारस्थित पुलमा बिग्रेर राखेको लु १ ख ६८७ नम्बरको बालुवा बोकेको ट्रकमा ठोक्किएको थियो।
जिल्ला प्रहरी कार्यालय रूपन्देहीका सूचना अधिकारी डिएसपी मनोहर प्रसाद भट्टका अनुसार दुर्घटनाबाट बसका चालक र यात्रुसहित ४३ जना घाइते भएका थिए । घाइतेहरुको चौराहा हस्पिटल बुटवल, एडमनसिटि हस्पिटल बुटवल र हिराचन्द्र हस्पिटल सालझण्डीमा उपचार भइरहेको उनले बताए । डीएसपी भट्टका अनुसार नाम नखुलेको बसका सहचालक गम्भीर घाइते छन् । उनको चौराहा हस्पिटलमा उपचार भएरहेको छ ।
सडकमा रोकेर राखेको ट्रकका चालकको खोजी भइरहेको डिएसपी भट्टले जानकारी दिए ।