२०८१ श्रावण २२ गते, मंगलवार

काठमाडौँ । बल्खु- हेटौँडा सडक अवरुद्ध भएको छ। गएरातिदेखिको अविरल वर्षाको कारण पहिरो खसेपछि बल्खु-हेटौँडा सडक खण्ड अवरुद्ध भएको हो ।
काठमाडौँको कीर्तिपुर नगरपालिका- ६ चोभारमा आज बिहान दुई ठाउँमा पहिरो खसेपछि काठमाडौँबाट हेटौँडा जोड्ने सडक खण्ड अवरुद्ध भएको हो । प्रहरी परिसर कीर्तिपुरबाट इन्सपेक्टर हिक्मतबहादुर थापासहितको प्रहरी टोली अहिले घटनास्थलमा पुगेको छ ।
‘चोभारमा दुई ठाउँमा पहिरो खसेको थियो । एउटा हटाइसकियो, अर्को पहिरो हटाउने प्रयास भइरहेको छ,’ इन्सपेक्टर थापाले भने, ‘अबको केही बेरमै सवारी साधन सञ्चालनमा आउँछन् ।’
पहिरो खसेपछि काठमाडौँबाट हेटौँडाका लागि छुटेका र हेटौँडाबाट काठमाडौँ आउँदै गरेका सवारी साधन बीच बाटोमै रोकिएका छन् । पहिरोसँगै झरेको ढुंगाले लाग्दा एकजना स्कुटर चालक पनि सामान्य घाइते भएका इन्सपेक्टर थापाले बताए ।