२०८१ माघ १ गते, मंगलवार

काठमाडौँ । गुल्मीस्थित रेसुङ्गा विमानस्थलमा करिब एक महिना देखि हवाई सेवा बन्द भएको छ । नेपाल वायुसेवा निगम नेपाल एरलायन्स सँग भएका दुइ वटा ट्वीनअटर जहाज ग्राउन्डेड भएको कारण करिब एक महिना देखि जिल्लामा हवाई सेवा बन्द भएको हो । हवाई सेवा बन्द भएपछि गुल्मेलीहरु केही समयका लागि हवाई सेवा बाट बञ्चित हुनु परेको छ ।
नेपाल वायुसेवा निगमले २०८० बैशाख २९ गते देखि गुल्मीमा व्यावसायिक उडान शुरु गरेको थियो । निगमले जिल्लामा व्यावसायिक उडान गरे सँगै शुरुमा सातामा तीन पटक सम्म उडान गर्दै आएको थियो । यात्रुहरुको बढ्दो चाँपका कारण उडान संख्यामा बृद्धि गरि सातामा चार पटक सम्म उडान गर्दै आएकोमा वायुसेवा निगमको जहाज ग्राउन्डेडहुन थालेपछि सातामा दुइ पटक र एक पटक हुँदै अहिले पुर्ण रुपमा सेवा बन्द भएको छ ।
जहाजको इन्जिन साइकल सकिए पछि नेपाल एयरलाइन्स सँग भएको दुइवटा ट्वीनअअटर जहाज ग्राउन्डेड भएको हो । पछिल्लो समयमा रेसुङ्गा विमानस्थल बाट साताका एक पटक बिहिबार मात्र उडान हुँदै आएको थियो । निगमले काठमाडौं बाट रेसुङ्गा लागि ७ हजार पाँच सय रुपैंया र रेसुङ्गा देखि काठमाडौंका लागि ७ हजार तीन सय रुपैयाँ भाडादर निर्धारण गरेको छ ।
रेसुङ्गा विमानस्थल बाट काठमाडौंका लागि २१ महिनाको अबधिमा एक तर्फी रुपमा ९० वटा उडान भैसकेको छ । -रासस