२०८१ माघ १७ गते, बिहीबार

काठमाडौँ । जिल्ला प्रहरी कार्यालय ओखलढुंगाले मध्यपहाडी राजमार्गको सडक खण्डमा ना १ ज ६४२१ नम्बरको जिप सडकबाट अन्दाजी ७० मिटर तल खसेर दुर्घटना भएको जानकारी दिएको छ । ओखलढुंगाको मानेभञ्ज्याङ गाउँपालिका ७ को हर्कपुरस्थित भँडारे खोलानजिकै खोटाङबाट काठमाडौंतर्फ जाँदै गरेको जिप दुर्घटना हुँदा ३ जनाको घटनास्थलमै मृत्यु भएको छ ।
जिप राति नै दुर्घटना भएको अनुमान गरिए पनि आज बिहान ८ बजे मात्रै फेला पारिएको थियो । दुर्घटनापछि जिप चालक फरार रहेका छन् ।
दुर्घटनामा मृत्यु हुनेहरूमा खोटाङको केपिलासगढी गाउँपालिका ३ की ५६ वर्षीया मायादेवी गुरुङ, उनको २८ वर्षीय छोरा पुजन गुरुङ र खोटाङकै दिक्तेल रुपाकोट मझुवागढी नगरपालिका १२ की ४५ वर्षीय तारा गुरुङ रहेको प्रहरीले जनाएको छ ।