२०८१ फाल्गुन ९ गते, शुक्रबार

काठमाडौँ । आज अन्तरराष्ट्रिय मातृभाषा दिवस। हरेक वर्षको फेब्रुवरी २१ मा यो दिवस मनाउने गरिन्छ । नेपालसहित विश्वका विभिन्न देशहरुमा विविध कार्यक्रम आयोजना गरी आज अन्तरराष्ट्रिय मातृभाषा दिवस मनाइँदै छ । सन् १९९९ को नोभेम्बरमा बङ्गलादेशले अन्तरराष्ट्रिय मातृभाषा दिवस मनाउन गरेको प्रस्तावलाई संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (युनेस्को)ले अनुमोदन गरपछि यो दिवस मनाउन थालिएको हो । तर संयुक्त राष्ट्रसङ्घको महासभाले सन् २००२ मा मात्रै यो दिवसको घोषणा गरेको हो । विविधतामा एकता र अन्तरराष्ट्रिय समझदारीलाई प्रवद्र्धन गर्नु यो दिवसको मुख्य उद्देश्य रहेको छ ।
आज विकास, सांस्कृतिक विविधता र अन्तरसांस्कृतिक संवाद सुनिश्चित गर्न पेरिसस्थित युनेस्कोको प्रधानकार्यालयमा ‘प्राविधिक संवाद, उच्चस्तरीय छलफल सत्र र सांस्कृति प्रदर्शन’ लगायत विविध कार्यक्रम आयोजना गरी अन्तरराष्ट्रिय मातृभाषा दिवस रजत जयन्ती समारोह मनाउन लागिएको छ ।
उक्त समारोह सबैका लागि गुणस्तरीय शिक्षा, समावेशी समाज निर्माण, सांस्कृतिक सम्पदाको संरक्षण गर्ने, दिगो विकासमा विज्ञान र प्रविधिको उपयोग एवं बहुभाषिकता र बहुसांस्कृतिकता प्रवद्र्धनमा केन्द्रित हुने युनेस्कोले जनाएको छ ।