२०८२ भाद्र १४ गते, शनिबार

काठमाडौँ । टी–२० सिरिजको दोस्रो खेलमा नेपाल ‘ए’ ले आसाममाथि फराकिलो जित निकालेको छ । भारतको गुवाहाटीमा शुक्रबार भएको खेलमा नेपालले आसामलाई ९६ रनले पराजित गरेको हो । जितसँगै पाँच खेलको शृङ्खलामा १–१ को बराबरी भएको छ । नेपालले दिएको १७४ रनको लक्ष्य पछ्याएको आसाम १५.२ ओभरमा अलआउट हुँदै ७७ रनमा समेटियो ।
आसामका रुहिनन्दन पेगुले सर्वाधिक १७, सिबशंकर रोयले १६ रन बनाए । नेपालका लागि लेगब्रेक बलर युवराज खत्रीले ४, बसिर अहमदले ३, कमलसिंह ऐरी, आकाश चन्द र विवेक यादवले १–१ विकेट लिए ।
त्यसअघि टस जितेर पहिले ब्याटिङ गरेको नेपाल ए ले २० ओभरमा ७ विकेट गुमाएर १७३ रन बनाएको थियो । नेपाल ए का लागि सन्दीप जोराले सर्वाधिक ३५, देव खनाल र पवन सर्राफले समान ३१–३१, बसिर अहमदले २७ तथा विवेक यादवले अविजित २६ रन बनाए ।
आसामका आकाश सेनगुप्ताले ३, अभिनव चौधरीले २ तथा आयुष्मान मलाकार र अभिलाष गोगोइले १–१ विकेट लिए । यसअघि बिहीबार भएको पहिलो खेलमा नेपाल ‘ए’ डीएल पद्धति अनुसार १५ रनले पराजित भएको थियो ।
नेपाल ए ले आसामसँग कुल ५ खेल खेल्नेछ ।