२०७४ असार ३ गते, शनिबार

काठमाडौ, ३ असार । देवी नाच प्रवद्र्धन तथा संरक्षण समितिले काठमाडौं महानगरपालिकाका मेयर, उपमेयरसहित चार वटा वडाका नवनिर्वाचित प्रतिनिधिलाई बधाई तथा शुभकामना दिएको छ । समितिले काठमाडौंमा कार्यक्रम गरी महानगरपालिकाका मेयर विद्यासुन्दर शाक्य, उपमेयर हरिप्रभा खड्गी र वडा नम्बर १८, २०, २४ र २५ का जनप्रतिनिधिलाई बधाई तथा शुभकामना दिएको हो । समितिले जनप्रतिनिधिलाई बधाईसँगै ज्ञापनपत्रसमेत बुझाएको छ ।
ऐतिहासिक इन्द्रजात्राका अवसरमा किलागलमा देखाइने देवी नाचको तत्काल संरक्षण गर्नुपर्ने माग गर्दै समितिले नवनिर्वाचित जनप्रतिनिधिहरुको ध्यानाकर्षण गराएको हो । देवी नाचको संरक्षण गर्ने भरपर्दो सहयोग नभएकाले लोप नै हुन लागेको भन्दै समितिले यसको दीर्घकालीन संरक्षण गर्नुपर्नेमा जोड दिएको छ ।