२०८० असार ६ गते, बुधबार

काठमाडौं । पोखरा अन्तर्राष्ट्रिय विमानस्थलमा बुधबार पहिलो पटक चिनियाँ जहाज सफल अवतरण भएको छ । चीनको ‘सिचुवान एयरलाइन्स’ले बुधबार बिहान छेन्दु–तियान्फु अन्तर्राष्ट्रिय विमानस्थलबाट पोखरा विमानस्थलमा सीधा उडान गरेको हो । ‘सिचुवान एयरलाइन्स’को एयरबस ए–३१९ विमान बुधबार बिहान ९ बजेर ५ मिनेट जाँदा पोखरा अन्तर्राष्ट्रिय विमानस्थलमा अवतरण गरेको थियो । एक सय ३५ जना यात्रुसहित आउने यो उडान चार्टर्ड उडान हो ।
संस्कृति, पर्यटन तथा नागरिक उड्यनमन्त्री सुदन किराँतीसहितले चीनबाट आएको विमानलाई स्वागत गरेका थिए । आगामी शुक्रबार र शनिबार फेवातालमा हुन लागेको ‘नेपाल–चीन फ्रेन्डसीप ड्रागन वोट फेस्टिभल’ मा सहभागी हुने चिनियाँ खेलाडी तथा पर्यटक लिएर विमान पोखरा आएको हो । सो विमान बुधबार नै पोखराबाट काठमाडौँ आएर नियमित उडानमार्फत छेन्तु फर्कने छ । गत पुस १७ गते पोखरा अन्तर्राष्ट्रिय विमानस्थल सञ्चालनमा आएको थियो ।