२०७४ असार ८ गते, बिहीबार

काठमाडौं, ८ असार । अतिवादी संगठन इस्लामिक स्टेट (आइएस)ले इराकको मोसुलस्थित ऐतिहासिक अल–नूरी मस्जिद ध्वस्त बनाइदिएको छ । इराकी सेनाले ऐतिहासिक मस्जिद आइएसले ध्वस्त बनाइदिएको दाबी गरेको हो । यो त्यही मस्जिद हो जहाँ सन् २०१४ मा आइएसका नेता अबू बक्र अल–बगदादीले शरण लिएका थिए । तर आइएसले यो मस्जिद एक अमेरिकी लडाकू विमानबाट गरिएको हमलामा नष्ट भएको दाबी गरेको छ ।
अमेरिकी सेनाले भने आइएसको भनाइलाई अस्वीकार गरेको छ । आकाशबाट लिइएको तस्बिरमा यो मस्जिदको अधिकांश हिस्सा नष्ट भएको देखाइएको छ । मोसुललाई आफ्नो नियन्त्रणमा लिन अघि बढेको इराकी सेनाका कमान्डर मेजर जनरल जोसेफ मार्टिनले आफूहरु मस्जिदबाट करिब ५० मिटर टाढा पुगेका बेला आइएसले अर्को एक गम्भीर अपराध गरेको बताए । उनले आइएसले मस्जिद ध्वस्त बनाएर मोसुलसहित सबै इराकीविरुद्ध अपराध गरेको आरोप लगाए । आइएसका यस्ता क्रियाकलापले पनि यो संगठन असभ्य रहेको र यसलाई परास्त गर्नुपर्ने उनको भनाइ थियो ।
यसैबीच इराकका प्रधानमन्त्री हैदर अल अबादीले मस्दिज ध्वस्त पारेर आइएसले आफ्नो हार स्वीकार गरेको बताएका छन् । यो मस्जिद सन् ११७२ मा निर्माण गरिएको थियो । आइएसले यसअघि इराक र सिरियाका केही महत्वपूर्ण स्थल पनि ध्वस्त पारिसकेको छ ।- एजेन्सी