२०७४ श्रावण ३१ गते, मंगलवार

काठमाडौं, ३१ साउन । उत्तर कोरियाका नेता किम जोङ उनले अमेरिकी क्षेत्र गुआममा मिसाइल आक्रमण गर्ने योजनाबारे उच्च सैन्य अधिकारीलाई जानकारी गराएका छन् । नेता किमले आफू निकट नेता तथा सैन्य अधिकारीलाई प्रशान्त महासागरमा रहेको गुआममा मिसाइल आक्रमणको तयारीबारे जानकारी गराएको उत्तर कोरियाको सरकारी समाचार संस्था केसिएनएले जनाएको छ । आक्रमण गर्नुअघि नेता किमले त्यहाँको अमेरिकी गतिविधि निरीक्षण गरिरहेको दाबी गरिएको छ ।
उत्तर कोरियाको रणनीतिक बलका कमाण्डर गुआममा मिसाइल आक्रमणका लागि अब नेता किमको आदेशको पर्खाइमा रहेको दाबी गरिएको छ । अमेरिकाले केही कदम चाल्ने बित्तिकै नेता किमले मिसाइल आक्रमणका लागि आदेश दिने सम्भावना रहेको बताइएको छ । गत हप्ता उत्तर कोरियाले गुआममा चार वटा मिसाइल आक्रमण गर्ने तयारी गरेको जनाएको थियो । गुआममा अमेरिकी बम वर्षक विमान तथा हतियारको भण्डार छ । अमेरिकाले पनि उत्तर कोरियाले आफ्नो गतिविधि नियन्त्रणमा नराखे सैन्य कारवाहीका लागि तयारी अवस्थामा रहेको र त्यो अवस्था आए उसले गम्भीर मूल्य चुनाउनुपर्ने चेतावनी दिँदै आएको छ ।-एजेन्सी