२०८१ मंसिर २४ गते, सोमबार

काठमाडौँ । राष्ट्रपति डोनाल्ड ट्रम्पले आफ्नो कार्यकालको पहिलो दिनमा नै जन्मको आधारमा अमेरिकी नागरिकताको अधिकार खारेज गर्ने बताएका छन् । एनबीसी न्यूजसँगको अन्तर्वार्तामा ट्रम्पले अमेरिकामा रहेका गैरकानुनी आप्रवासीहरूलाई देशबाट निष्कासन गर्ने आफ्नो योजना फेरि दोहोर्याएका हुन् । उनले ड्रिमर्स आप्रवासीहरूको सुरक्षाका लागि कदम चाल्ने कुरा पनि गरे। ड्रिमर्स आप्रवासीहरू ती आप्रवासीहरू हुन् जो बाल्यकालमा अमेरिका आएका थिए र कुनै कागजातहरू छैनन्।
अमेरिकी संविधानको १४ औं संशोधन अनुसार अमेरिकामा जन्मेका कुनै पनि बालबालिकाले जन्मिनेबित्तिकै अमेरिकी नागरिकता पाउन योग्य हुनेछन् । ती बालबालिका जुनसुकै देशको नागरिकका सन्तान भए पनि अमेरिकी नागरिकता पाउने व्यवस्था छ ।
यद्यपि, ट्रम्पको निर्णयले कानुनी अवरोधको सामना गर्न सक्छ। अन्तर्वार्ताका क्रममा ट्रम्पले राष्ट्रपति बनेपछि नेटोबाट बाहिरिने विषयमा गम्भीरतापूर्वक विचार गर्ने बताएका छन् । उनले गर्भपतनका लागि प्रयोग हुने चक्की प्रतिबन्ध नगर्ने वाचा पनि गरे।
ट्रम्पले राष्ट्रपति बनेपछि फेडरल रिजर्भ (सेन्ट्रल बैंक) का अध्यक्ष जेरोम पावेललाई राजीनामा दिन आग्रह गर्ने कुनै योजना नभएको बताए । ट्रम्पले राष्ट्रपति बनेलगत्तै क्यापिटल हिल घटनाका दोषीलाई माफी दिने वाचा गरेका छन् । सन् २०२० को राष्ट्रपतीय निर्वाचनमा ट्रम्प पराजित भएपछि जनवरी ६, २०२१ मा उनका केही समर्थक क्यापिटल हिल (अमेरिकी संसद) भित्र पसेर तोडफोड गरेका थिए । विज्ञहरुका अनुसार ट्रम्पका धेरै योजनाहरु अदालतमा समस्यामा पर्न सक्नेछन् । यसबाहेक, नेटोबाट अलग हुने उनको योजनाले अमेरिकी क्याम्पका देशहरूमा असहजता सिर्जना गर्न सक्छ। – एजेन्सी