२०८१ पुष २७ गते, शनिबार

काठमाडौँ । अमेरिकासँगै बेलायतले रुसी तेल कम्पनीमाथि प्रतिबन्ध लगाएको छ । रुसले युक्रेनमा आक्रमण गरेपछि अमेरिकासँगै बेलायतले ऊर्जा कम्पनी गाजप्रोम नेफ्ट र सर्गुटनेफ्तेगजमाथि पहिलो पटक प्रत्यक्ष प्रतिबन्ध लगाइएको हो ।
यसमार्फत व्यापारी र अधिकारीदेखि बीमा कम्पनी र सयौँ तेल ट्याङ्करसम्मका दुई सयभन्दा बढी संस्था र व्यक्तिमाथि प्रतिबन्ध लगाइएको छ ।
बेलायतका विदेश सचिव डेभिड लेमीले भने, ‘रुसी तेल कम्पनीहरूसँग लड्दा रुसको युद्धको कोष खाली हुनेछ र पुटिनबाट खोसिएको हरेक रुबल (रुसी मुद्रा) ले युक्रेनका जनताको जीवन बचाउन मद्दत गर्नेछ।’
अमेरिकी अर्थ मन्त्रालयले शुक्रबार घोषणा गरेका केही प्रतिबन्धलाई कानुन बनाइने बताइएको छ। यदि आगामी ट्रम्प प्रशासनले यी प्रतिबन्धहरू हटाउन चाहन्छ भने उसले त्यसलाई कंग्रेसबाट पारित गर्नुपर्नेछ। यसबाहेक अमेरिकाले रुसबाट कानुनी रूपमा ऊर्जा किन्न सक्ने रुसका सहयोगीहरूलाई सीमित पार्ने काम पनि गरिरहेको छ । – एजेन्सी