२०८२ जेष्ठ १५ गते, बुधबार

काठमाडौँ । अमेरिकाले सामाजिक सञ्जाल प्रोफाइलको कडा जाँच गर्ने योजनाअन्तर्गत विश्वभरका अमेरिकी दूतावास र कन्सुलर सेक्सनहरूलाई विद्यार्थी भिसा (एफ, एम र जे) अन्तर्वार्ता तालिका बन्द गरेको छ । मंगलबार जारी कूटनीतिक केबलअनुसार यहूदी विरोधी भावना फैलाउने वा राष्ट्रिय सुरक्षामा खतरा उत्पन्न गर्न सक्ने भएकाले अन्तर्राष्ट्रिय विद्यार्थीहरूलाई रोक्ने लक्ष्य राखेर अमेरिकाले उक्त निर्णय गरेको हो ।
अर्को निर्देशन नआएसम्म नयाँ अन्तर्वार्ता तालिका नथप्न अमेरिकीराष्ट्रपति डोनाल्ड ट्रम्पको प्रशासनले जनाएको छ । तर पहिले नै निर्धारित अन्तर्वार्ताहरू भने जारी रहनेछन्।
विदेश मन्त्रालयका प्रवक्ता ट्यामी ब्रुसले भिसा प्रक्रियामा ढिलाइबारे टिप्पणी गर्न अस्वीकार गर्दै प्रवेश जाँचलाई गम्भीरतापूर्वक लिइने बताएकी छन्। विदेशमन्त्री मार्को रुबियोले गत हप्ता भिसालाई विशेषाधिकार भन्दै क्याम्पसमा बाधा पुर्‍याउने विद्यार्थीको भिसा खारेज गर्ने चेतावनी दिएका थिए। यो कदम हार्वर्ड विश्वविद्यालयमाथि विदेशी विद्यार्थी भर्ना रोक्ने गृह सुरक्षा विभागको प्रयासपछि आएको हो, जुन शुक्रबार अदालतले रोकिदिएको थियो।
ट्रम्प प्रशासनले हार्वर्डसँगको १० करोड डलरको सम्झौता रद्द गर्ने र अनुदान ट्रेड स्कुलमा स्थानान्तरण गर्ने योजना बनाएको छ। यस नीतिले नेपाली विद्यार्थीहरूलाई पनि असर गर्ने देखिएको छ। अमेरिकामा उच्च शिक्षा अध्ययनका लागि हजारौँ नेपाली जाने गरेका छन्। – एजेन्सी