२०८२ भाद्र १५ गते, आईतवार

काठमाडौँ । इजरायलको आक्रमणमा परी यमनका प्रधानमन्त्री अहमद गालिब अल–रहावी मारिएको यमनका हुथी विद्रोहीहरूले दाबी गरेका छन् । हुथी विद्रोहीहरूको भनाइमा गाजा युद्ध सुरु भएपछि यो उनीहरूको सबैभन्दा ठूलो क्षति हो, किनभने यस अवधिमा वरिष्ठ अधिकारीको मृत्यु भएको यो पहिलो घटना हो ।
समाचार एजेन्सी रोयटर्सले हुथी विद्रोहीको समाचार एजेन्सीलाई उद्धृत गर्दै समूहको सर्वोच्च राजनीतिक परिषद्का प्रमुख महदी अल-मसतले शनिबार उक्त कुरा बताएको उल्लेख गरेको छ।
बिहीबार राजधानी सानामा भएको आक्रमणबारे विस्तृत जानकारी दिइएको छैन, तर यसमा अन्य पनि धेरै व्यक्ति घाइते भएको बताइएको छ।एएफपीका अनुसार अल-राहवीलाई अन्तिमपटक बुधबार सानामा एक सार्वजनिक कार्यक्रममा देखिएको थियो।
हुथी विद्रोहीले जारी गरेको विज्ञप्तिमा भनिएको छ, ‘हामी योद्धा अहमद गालिब नासिर अल-राहवीको मृत्युको घोषणा गर्दछौँ। उनको मृत्यु उनका धेरै सहकर्मीसँगै भएको छ। उनलाई इजरायलले निसाना बनाएको थियो।’
विज्ञप्तिमा आक्रमणमा घाइते भएका धेरै सहकर्मीको अस्पतालमा उपचार भइरहेको पनि उल्लेख गरिएको छ। यसअघि इजरायलले सानामा इरान समर्थित हुथी समूहका प्रमुख, रक्षामन्त्री र अन्य अधिकारीलाई निसाना बनाइएको बताएको थियो।
अहमद अल-रहवी एक वर्षअघि मात्र प्रधानमन्त्री बनेका थिए, तर सरकारको बागडोर उनका उपप्रधानमन्त्री मोहम्मद मुफ्ताहको हातमा थियो। शनिबार मुफ्ताहलाई प्रधानमन्त्रीको कार्यभार दिइएको छ। – एजेन्सी