२०८२ मंसिर १ गते, आईतवार

काठमाडौँ । संयुक्त राज्य अमेरिकामा एक अवैध भारतीय मूलका आप्रवासीको गल्तीले हजारौं भारतीयहरू सहित १७,००० विदेशीहरू पीडित भएका छन् । अगस्टमा, फ्लोरिडामा एक भारतीय मूलका ट्रक चालकको गल्तीले तीन जनाको मृत्यु भएको थियो। यसपछि, अमेरिकी राज्य क्यालिफोर्नियाले विदेशी नागरिकहरूलाई जारी गरिएका १७,००० व्यावसायिक ड्राइभिङ लाइसेन्स रद्द गर्ने निर्णय गरेको छ।
अमेरिकी राष्ट्रपति डोनाल्ड ट्रम्पको प्रशासनले यी मध्ये केही लाइसेन्सहरू अवैध आप्रवासीहरूलाई गलत तरिकाले जारी गरिएको हुन सक्ने चिन्ता व्यक्त गरेपछि क्यालिफोर्नियाले यो कदम चालेको हो। भारतीय मूलका अवैध आप्रवासी चालकले यू-टर्न लिने प्रयास गर्दा भएको दुर्घटनापछि संयुक्त राज्य अमेरिकाभरि व्यावसायिक चालक अनुमतिपत्र जाँच सुरु भएको थियो ।
क्यालिफोर्निया सरकारले प्रभावित आप्रवासी चालकहरूको विवरण सार्वजनिक नगरे पनि , यो कदमले भारतीय र भारतीय मूलका ट्रक चालकहरूलाई सबैभन्दा बढी असर गर्ने विश्वास गरिएको छ।
संयुक्त राज्य अमेरिकामा रहेका भारतीय-सिख समुदायले विगत एक दशकमा ट्रक चालकहरूको गम्भीर अभावलाई सम्बोधन गर्न महत्त्वपूर्ण भूमिका खेलेका छन्। लस एन्जलस टाइम्समा २०१९ मा प्रकाशित एक रिपोर्ट अनुसार, क्यालिफोर्नियामा पनि सिख ट्रक चालकहरूको संख्या तीव्र गतिमा बढेको छ।
क्यालिफोर्नियाका गभर्नर गेभिन न्यूसमले बुधबार भने – ती लाइसेन्सहरू अमान्य छन् किनभने तिनीहरूको म्याद समाप्त भएको छ । ती लाइसेन्सधारी व्यक्तिहरूलाई अब संयुक्त राज्य अमेरिकामा बस्न कानूनी अनुमति छैन। क्यालिफोर्नियाको यातायात विभागलाई उद्धृत गर्दै समाचार एजेन्सी एपीले यही कारणले गर्दा यी लाइसेन्सहरू अब रद्द गरिने रिपोर्ट गरेको छ। रिपोर्टका अनुसार, गत महिना क्यालिफोर्नियामा अर्को भारतीय अवैध ट्रक चालकसँग भएको दुर्घटनामा तीन जनाको मृत्यु भएको थियो, जसले गर्दा यो मुद्दामा थप चिन्ता बढेको छ। अवैध चालकहरूको मुद्दा अब क्यालिफोर्निया र ट्रम्प प्रशासन बीचको राजनीतिक टकराव बनेको छ । जसको एकातिर ट्रम्प प्रशासन छ भने अर्कोतिर डेमोक्र्याटिक शासित क्यालिफोर्निया सरकार रेहेको छ । – एजेन्सी