२०८२ फाल्गुन ३ गते, आईतवार

काठमाडौँ । बंगलादेश नेशनल पार्टी (बीएनपी) नेता तारिक रहमानले मंगलबार साँझ प्रधानमन्त्रीको रूपमा शपथ लिने भएका छन्। नयाँ मन्त्रिपरिषद्को शपथ ग्रहण समारोहको तयारी तीव्र पारिएको छ। अन्तरिम सरकारका प्रमुख सल्लाहकार मुहम्मद युनुसले १३ देशका सरकार प्रमुखहरूलाई शपथ ग्रहण समारोहमा भाग लिन आमन्त्रित गरेका छन्। यो कदमलाई नयाँ बंगलादेश सरकारको विदेश नीति र क्षेत्रीय सन्तुलनको संकेतको रूपमा हेरिएको छ। आमन्त्रित देशहरूमा नेपालसहित भारत, चीन, साउदी अरेबिया, पाकिस्तान, टर्की, संयुक्त अरब इमिरेट्स, कतार, मलेसिया, ब्रुनाई, श्रीलंका, माल्दिभ्स र भुटान रहेका छन्। दक्षिण एसियादेखि पश्चिम एसियासम्मका देशहरूको भेलाले कार्यक्रमलाई कूटनीतिक रूपमा महत्त्वपूर्ण बनाएको छ।
ढाकामा हुने यो समारोहलाई केवल औपचारिक कार्यक्रम मात्र नभई नयाँ सरकारको अन्तर्राष्ट्रिय सन्देशको रूपमा हेरिएको छ। विशेष गरी भारत, पाकिस्तान र चीनलाई निमन्त्रणा गरेर क्षेत्रीय सन्तुलन कायम राख्ने प्रयास गरिएको छ। नयाँ मन्त्रिपरिषद्सँगै शपथ लिन लागेका तारिक रहमानले घरेलु राजनीतिलाई स्थिर बनाउने, अर्थतन्त्रलाई ट्रयाकमा ल्याउने र अन्तर्राष्ट्रिय सम्बन्धमा सन्तुलन कायम राख्ने ठूलो चुनौतीको सामना गर्नुपर्नेछ। हालै भएको चुनावमा बीएनपी गठबन्धनले २१२ सिट जित्यो भने जमात-ए-इस्लामी गठबन्धनले ७७ सिट जित्यो। कुल २९९ सिटमा प्रतिस्पर्धा भएको थियो।