२०७१ श्रावण १९ गते, सोमबार

काठमाडौ। बजार पठाएको ६ महिनामै माइक्रोसफ्टले एन्ड्रोइड अपरेटिङ सिस्टम राखिएको आफ्नो पहिलो मोबाइल सेट नोकिया-एक्सको उत्पादन बन्द गरेको छ । उत्पादन भइसकेका सेट भने बिक्री जारी रहनेछ र माइक्रोसफ्टले त्यस्ता सेटको लागि सेवा पनि जारी राख्नेछ ।एन्ड्रोइड अपरेटिङ सिस्टम राखिएको माइक्रोसफ्टको पहिलो फोन नोकिया एक्स धेरै बिक्री हुने स्मार्टफोनमध्येमा पर्छ । एसियाली बजारमा यो सस्तो स्मार्टफोनको माग बढी भएको थियो । माइक्रोसफ्टले विन्डोज फोनका बिक्री बढाउन यस्तो कदम चालेको हुनसक्ने अनुमान गरिएको छ । कम्पनीले नोकिया एक्सको दोस्रो सिरिज नोकिया एक्स २ पनि बजारमा पठाएको थियो । नोकिया एक्सको उत्पादन बन्द गर्ने घोषणसँगै माइक्रोसफ्टले आफ्ना १८ हजार कर्मचारीलाई अवकाश दिने भएको छ । माइक्रोसफ्टले सात महिना अघि नोकियाको मोबाइल सेट बिभाग किनेको थियो ।