२०८१ फाल्गुन २० गते, मंगलवार

काठमाडौँ । कम्पनी रजिष्ट्रारको कार्यालयले अनलाइन माध्यमबाट कम्पनी दर्ता तथा खारेज गर्ने व्यवस्था कार्यान्वयनमा ल्याएको छ । कार्यालयका उपरिजस्ट्रार देवीप्रसाद सुवेदीले कम्पनी संस्थापना, सञ्चालन तथा प्रशासन सम्बन्धी कामलाई सहज, सरल र थप पारदर्शी बनाउन फागुन १९ गतेदेखि ‘कम्पनी प्रशासन व्यवस्थापन सूचना प्रणाली-सीएएमआइएस’ का सबै मोडयूलहरूलाई पूर्णरूपमा कार्यान्वयनमा ल्याइएको जानकारी दिए । उनका अनुसार अब यस प्रणालीको प्रयोग गरी भौतिक रूपमा कार्यालयमा उपस्थित नभइकन कम्पनी दर्तादेखि खारेजीसम्मका सबै प्रक्रियाहरू सम्पन्न गर्न सकिने छ ।
सीएएमआइएस प्रणालीबाट कार्यालयमा आवेदन दिन सकिने, प्राप्त आवेदनहरू प्रणालीबाटै स्वचालित रूपमा सम्बन्धित कर्मचारीको डेस्कमा तोकिने, नाम स्वीकृति र कम्पनी दर्ताका निवेदनहरू एक तहबाट नै टुङ्गो लगाइने व्यवस्था मिलाइएको कार्यालयले जनाएको छ ।
सम्बन्धित शेयरधनी, सञ्चालक वा निवेदक पक्षको सनाखत लगायत भौतिक उपस्थितिबाट जाँच गर्न आवश्यक पर्ने प्रकृतिका आवेदनहरूबाहेक अरू सबै आवेदनहरू अनलाइन प्रणालीबाटै टुङ्गो लगाई त्यससम्बन्धी पत्र, विवरणलगायत कागजातहरू डिजिटल हस्ताक्षर गरी सम्बन्धित कम्पनीको अनलाइन अकाउन्टमा स्वचालित रूपमा पठाई कम्पनी प्रशासनको कार्यलाई थप सहज र सरल बनाउने कार्यालयले जनाएको छ ।
कार्यालयका अनुसार आवेदन पेश भएपछि कम्पनी रजिष्ट्रार कार्यालयमा तोकिएको कर्मचारी र त्यसपछि त्यस विषयमा अनलाइन प्रणालीबाटै सम्बन्धित कम्पनीलाई सूचना दिइने तथा साविकमा सञ्चालनमा रहेको प्रणालीका सम्पूर्ण निवेदन तथा कागजातहरू सम्बन्धित कम्पनीले सीएएमआइएस प्रणालीबाटै हेर्न सक्ने व्यवस्थासमेत मिलाइएको छ ।
नागरिकता लगायतका व्यक्तिगत विवरणका लागि राष्ट्रिय परिचयपत्र प्रणाली, करदाताको प्यान नम्बर लगायत कार्याका लागि आन्तरिक राजस्व कार्यालय राजस्व सूचना प्रणाली, लेखा परीक्षकको यूडीआइएन लगायतका विवरणका लागि नेपाल चार्टर्ड एकाउन्टेन्ट्स संस्थाको प्रणालीसँग आबद्ध गरी कम्पनीले सम्बन्धित वितरण प्राप्त गर्न सक्ने कार्यालयले जनाएको छ ।
सरकारले गत महिना मात्रै अध्यादेशमार्फत कम्पनी बन्द गर्दा हुने झन्झटलाई अन्त्य गरिने व्यवस्था गरेको थियो । विवरण नबुझाएको कारण कम्पनीलाई लाग्ने जरिवानामा ९० प्रतिशत छुट दिई कम्पनीको दर्ता खारेजीलाई सहज बनाएको थियो ।