२०८२ कार्तिक ५ गते, मंगलवार

काठमाडौँ । अमेरिकी कम्पनी इन्भेन्टवुडलेले ‘सुपरवुड’ नामक काठको नयाँ प्रकारको इन्जिनियरिङ गरेको छ, जसको शक्तिदेखि तौल अनुपात स्टिलको तुलनामा १० गुणासम्म बढी छ भने यो ६ गुणासम्म हलुका पनि छ।
सामग्री वैज्ञानिक लियाङबिङ हुले सह-स्थापना गरेको कम्पनी इन्भेन्टवुडले अब ‘सुपरवुड’ लाई व्यावसायिक उत्पादनको रूपमा बजारमा ल्याएको छ। एक दशकभन्दा बढी समयदेखि मानवलाई ज्ञात सबैभन्दा पुरानो निर्माण सामग्रीमध्ये एक काठलाई नयाँ रूप दिन खोजिरहेका हुले युनिभर्सिटी अफ मेरिल्यान्डमा काम गर्दा यसलाई पुन:इन्जिनियरिङ गर्ने नवीन तरिकाहरू पत्ता लगाएका थिए।
उनको वास्तविक लक्ष्य सेलुलोज (वनस्पति फाइबरको मुख्य घटक) को प्रयोग गरेर काठलाई अझ बलियो बनाउनु थियो। सन् २०१७ मा हुले साधारण काठलाई रासायनिक रूपमा उपचार गरेर र त्यसपछि तातो प्रेसरमा कम्प्रेस गरेर यसलाई निकै बलियो बनाएका थिए।
यस प्रक्रियाले काठलाई सेलुलर स्तरमा सघन बनायो। नेचर जर्नलमा प्रकाशित एक अध्ययनअनुसार, यसरी तयार भएको काठको शक्ति-देखि-तौल अनुपात ‘धेरैजसो संरचनात्मक धातु र मिश्र धातुहरूभन्दा उच्च’ थियो।
वर्षौँदेखि प्रक्रियालाई पूर्णता दिएपछि र १४० भन्दा बढी पेटेन्ट दर्ता गरेपछि, सुपरवुड अब व्यावसायिक रूपमा लन्च भएको छ। इन्भेन्टवुडका सीईओ एलेक्स लाउले भने, ‘रासायनिक र व्यावहारिक दृष्टिकोणबाट यो काठ नै हो।’
यसले भवनहरूलाई आजको भन्दा चार गुणासम्म हलुका बनाउन सक्नेछ। यसले भूकम्प प्रतिरोधी संरचना बनाउन, निर्माण छिटो र सजिलो बनाउन मद्दत गर्ने लाउले बताए। कम्पनीले सुरुमा बाहिरी प्रयोगमा ध्यान केन्द्रित गर्ने र अर्को वर्षदेखि भित्री प्रयोग (जस्तै पर्खाल प्यानेलिङ, र घरको फर्निचर) मा जाने योजना बनाएको छ। सुपरवुड कीराबाट पनि अप्रभावित छ र यसले आगो प्रतिरोधी परीक्षणहरूमा उच्चतम रेटिङ प्राप्त गरेको छ। यो काठ लगभग सबै प्रकारका काठ र बाँसमा परीक्षण गर्दा सफल भएको कम्पनीले बताएको छ। -सीएनएन