२०८२ कार्तिक ४ गते, सोमबार

काठमाडौँ । फ्रान्सको राजधानी पेरिसस्थित विश्वकै सर्वाधिक चर्चित लुभ्र म्युजियमबाट बहुमूल्य ८ वटा गहना चोरी भएपछि म्युजियम बन्द गरिएको छ। आइतबार बिहान करिब ९:३० बजे (स्थानीय समय) चोरहरू म्युजियम खुलेको केही समयपछि फर्निचर उठाउने लिफ्टको सहायताले एउटा झ्यालबाट ‘अपोलोको ग्यालरी’ मा प्रवेश गरेका थिए। फ्रान्सेली शाही गहना राखिएको यो ग्यालरीभित्रबाट चोरहरूले जम्मा चार मिनेटभित्र आठ वटा बहुमूल्य वस्तु चोरेर मोटरसाइकलमा भागेका थिए।
चोरी भएका गहनाहरू नेपोलियन प्रथमकी पत्नी महारानी मेरी-लुइस र नेपोलियन तृतीयकी पत्नी महारानी युजेनीका हुन्, जसमा दुई वटा टियारा (मुकुट), नीलमणि र पन्नाका हार, झुम्का र दुई वटा ठूला ब्रोच लगायतका वस्तुहरू छन्।
फ्रान्सेली राष्ट्रपति इमानुएल म्याक्रोनले यस चोरीलाई ‘सम्पदामाथिको आक्रमण’ भन्दै निन्दा गरेका छन् र चोरहरूलाई न्यायको कठघरामा ल्याइने प्रतिबद्धता व्यक्त गरेका छन्। घटनापछि प्रहरीले म्युजियममा घेरा हाली अनुसन्धान सुरु गरेको छ। – एजेन्सी