२०८० जेष्ठ २९ गते, सोमबार

काठमाडाैँ । सङ्घीय मामिला तथा सामान्य प्रशासन मन्त्रालयले कार्यालय समयमा टिकटक नबनाउन निर्देशनसमेत दिएको छ । मन्त्रालयले एक सूचना प्रकाशित गरी निजामती कर्मचारीले कार्यालय समयमा टिकटक बनाए कारबाही गर्ने जनाएको छ । कार्यालय समयमा कार्यालयको पोसाक लगाएर, कार्यालयको सवारीसाधन प्रयोग गरेर र कार्यालय हाताभित्र टिकटक बनाउन रोक लगाइएको मन्त्रालयका सहसचिव एवं प्रवक्ता कमलप्रसाद भट्टराईले बताए ।
उनले भने, “कार्यालयसँग सम्बन्धित कामबारे पनि टिकटक नबनाउन हामीले निर्देशन दिएका छौँ, यदि निजामती कर्मचारीले यस्ता नियम उल्लङ्घन गरेको पाइएमा अनुशासन नियमअन्तर्गत कारबाही हुनेछ ।” पछिल्लो समय टिकटकमा निजामती कर्मचारी उच्छृङ्खल भएको भन्दै गुनासो आएकाले उक्त कदम चालिएको मन्त्रालयले जनाएको छ ।