क्रान्तिकारी !
२०८२ पुष १ गते, मंगलवार
- खेम सी
हो, उ कान्तिकारी हो
किनकि बिहानै एक झोला तरकारी बोक्दै
नेताको घरमा चिया पिउन पुग्छ
नेतालाई देख्ने बित्तिकै साष्टांग दण्डवत गर्छ
अनि उ क्रान्तिकारी नभएर को ?
हो, उ क्रान्तिकारी हो
किनकि उ दिनभर चन्दा र असुलीमा लाग्छ
साँझ परेपछि भट्टीमा छिर्छ
नेता , पार्टी र संगठनको उछित्तो काट्छ
फेरी बिहान जुरुक्क उठेर नेताको दैलोमा पुग्छ
जदौ गर्दै त्वमेब माता त्वमेब पिताको स्तुतुती गर्छ
अनि उ क्रान्तिकारी नभएर को ?
हो, उ क्रान्तिकारी हो
किनकि पार्टी र संगठनको हिसाब किताब मुट्ठीमा लिन्छ
पारदर्शिताको कुरो गरे अराजक भन्दै संगठनवाट एक्लाउछ
मासु-भात र रक्सि पार्टी र संगठनको नाममा धोक्छ
नीति , बिधि र विधानको कुरा गरे बिचमै रोक्छ
बिहानै एकाध गोटा फलफुल बोक्दै
नेताको दैलोमा गएर भैलो खेल्छ
अनि उ क्रान्तिकारी नभएर को ?
हो, उ कान्तिकारी हो
आफू कुनै काम गर्दैन
अरुलाई किन काम गर्यो भनेर चुक्ली लाउछ
रत्नपार्क र भृकुटी मण्डपमा बदाम खाएर दिन बिताउछ
आफु विद्वान हुँ भन्दै दुई चार जनालाई प्रवचन सुनाउछ
अनि उ क्रान्तिकारी नभएर को ?
हो, उ क्रान्तिकारी हो
लेवी र चन्दा उठाएर परिवार पाल्छ
साँझ बिहान नेताको दैलोमा धाउछ
गणेश हुँ भन्दै कुमारहरुको चुक्ली लगाउछ
नेताको काखमा बस्छ, त्यही लुटुपुटु गर्छ
अनि उ इमान्दार र कर्तव्यनिष्ठ कहिलिंछ
उसका सयौं खत मिनाहा हुन्छ
अनि उ क्रान्तिकारी नभएर को ?
