२०८३ कार्तिक १९ गते, बिहीबार

काठमाडौँ । लामो समयदेखि वार्षिक विवरण नबुझाएका तथा खारेजी प्रक्रियामा नगएका कम्पनीलाई जरिवाना छुटसहित विवरण अद्यावधिक गर्ने समयसीमा आगामी पुस मसान्तसम्म थप भएको छ । यसअघि कात्तिक मसान्तसम्म रहेको म्याद दुई महिना बढाइएको हो ।
कम्पनी रजिष्ट्रारको कार्यालयका अनुसार आर्थिक वर्ष २०८२/८३ सम्मको कर, शुल्क तथा दस्तुर बुझाएमा सोभन्दा अघिका आर्थिक वर्षको सबै कर, शुल्क, दस्तुर र जरिवाना मिनाहा हुनेछ ।
यसैबीच, नेपालमा नयाँ कम्पनी दर्ता हुने क्रम बढेको छ । आर्थिक वर्ष २०८१/८२ मा २० हजार ७३६ कम्पनी दर्ता भएकामा गत आव २०८२/८३ मा २६ हजार २९१ पुगेका छन् । यो अघिल्लो वर्षको तुलनामा ५ हजार ५५५ ले बढी हो । चालु आवको कात्तिक १२ गतेसम्म थप १० हजार ४८० कम्पनी दर्ता भइसकेका छन् ।
कार्यालयका रजिष्ट्रार कृष्णकुमारी श्रेष्ठले विदेशबाट फर्किएका नेपालीले सीप, प्रविधि र पुँजी स्वदेशमा लगानी गर्न थालेसँगै कम्पनी दर्ता बढेको बताए ।
कार्यालयका अनुसार हालसम्म तीन लाख ८८ हजार ६९० कम्पनी दर्ता भएकामा १४ हजार ९७० वटा खारेज भएका छन् । कार्यालयले कम्पनी दर्ता, नियमन, वार्षिक विवरण तथा वास्तविक धनीको अभिलेख व्यवस्थापनका साथै खारेजीसम्बन्धी काम गर्दै आएको छ ।