२०८२ चैत्र १९ गते, बिहीबार

काठमाडौँ ।  नासाको आर्टेमिस–२ चन्द्र मिसन बुधवार अमेरिकी राज्य फ्लोरिडाबाट प्रक्षेपण गरिएको छ। ५० वर्षभन्दा बढी समयपछि चन्द्रमाको परिक्रमा गर्ने यो पहिलो मानवसहितको उडान हो, जसमा चार जना अन्तरिक्ष यात्रीहरू सहभागी छन्। ओरियन स्पेसक्राफ्ट (अन्तरिक्ष यान) जडित ‘स्पेस लन्च सिष्टम’ रकेट पूर्वी समयअनुसार बेलुकी ६ः३५ बजे नासाको केनेडी स्पेस सेन्टरबाट प्रक्षेपण गरिएको थियो। यो आर्टेमिस कार्यक्रमअन्तर्गत नासाको पहिलो मानवसहितको मिसन हो।  चार सदस्यीय चालक दलमा नासाका अन्तरिक्ष यात्रीहरू रिड वाइजम्यान, भिक्टर ग्लोभर र क्रिस्टिना कोचका साथै क्यानेडियन स्पेस एजेन्सीका अन्तरिक्ष यात्री जेरेमी ह्यान्सेन रहेका छन्। प्रक्षेपणको उल्टो गणना (काउन्टडाउन) टी–१० मिनेटको समयमा केहीबेर रोकिए पनि केही मिनेटपछि पुनः सुरु गरिएको थियो।

आर्टेमिस–२ मिसनले गहिरो अन्तरिक्ष मिसनहरूका लागि आवश्यक पर्ने व्यापक क्षमताहरूको प्रदर्शन गर्नेछ। नासाकाअनुसार यसको उद्देश्य ओरियनको जीवन–रक्षक प्रणाली (लाइफ–सपोर्ट सिस्टम)को प्रमाणीकरण गर्नु र आर्टेमिस–३ तथा त्यसपछिका चन्द्र मिशनहरूको सफलताका लागि महत्वपूर्ण सञ्चालनहरूको अभ्यास गर्नु हो।

चालक दलका सदस्यहरू पृथ्वी फर्कनुअघि चन्द्रमाको अर्को तर्फको भाग (फार साइड)बाट करिव ७ हजार ४ सय किलोमिटर परसम्म पुग्नेछन्। यो मिसनले अन्तरिक्ष यात्रीहरूलाई विगत आधा शताब्दीको तुलनामा पृथ्वीबाट सबैभन्दा टाढा र चन्द्रमाको सबैभन्दा नजिक लैजानेछ। – एजेन्सी