२०८१ फाल्गुन २६ गते, सोमबार

काठमाडौँ । मौरीले आक्रमण गर्दा मलामीको भागाभाग भएको छ भने २५ जना घाइते भएका छन् । भारतको राजस्थानको सिकर जिल्लामा भएको उक्त घटनामा २५ भन्दा बढी घाइते भएका हुन् । घाइते मध्ये १५ जना गम्भिर अवस्थामा रहेकालाई जिल्लाको खन्डेलारोडस्थित एक निजी अस्पतालमा भर्ना गरिएको बताइएको छ । स्थानीय ८० वर्षीय माधोसिंह शेखावतको निधनपछि अन्तिम संस्कारका लागि उनको शव लिएर मलामी गाउँकै मसानघाट पुगेका थिए । जलाउनका लागि चितामा शव राखे । त्यसपछि केही मलामी मसानघाटमा राखिएका दाउरा लिएन गए ।
तब मसानघाटको मुख्य गेट नजिक रहेको पिपलको रुफमा गोला बनाएका मौरीले मलामीमाथि आक्रमण गरे । मौरीको आक्रमणपछि मलामीको भागाभाग भयो । चारैतर्फ ६ फिट अग्लो पर्खाल भएका कारण बाहिर निस्किन सकेनन् । जसका कारण धेरै जना मौरीको आक्रमणमा परी घाइते भए ।
इन्डिया टीभिमा प्रकाशित रिपोर्टअनुसार तत्काल घाइतेहरुलाई एम्बुलेन्स बोलाएर अस्पताल लगिएको थियो । करिब डेढ घण्टापछि हेलमेट लाएर मलामीले अन्तिम संस्कार सम्पन्न गरे । स्थानीयले मसानघाटबाट मौरीको गोला हटाउन माग गरेका छन् । – एजेन्सी