काठमाडौँ । नेपाल कम्युनिष्ट पार्टी (माओवादी)का प्रवक्ता प्रकाण्ड सीले जेन–जीको असली प्रतिनिधि नेपाल कम्युनिष्ट पार्टी (माओवादी) मात्रै भएको ठोकुवा गरेका छन् । सो पार्टीको बागमती प्रदेश सचिवालयको चौथों पूर्ण बैठकलाई सम्बोधन गर्दै उनले सो ठोकुवा गरेका हुन् ।

प्रवक्ता प्रकाण्ड सीले नेपाल कम्युनिष्ट पार्टी (माओवादी)ले देश र जनताको पक्षमा उठाएको एजेण्डाको जगमा टेकेर जेन–जी विद्रोह भएको तथ्य प्रस्तुत गर्दै जेन–जीको असली प्रतिनिधि नेपाल कम्युनिष्ट पार्टी (माओवादी) मात्रै भएको बताए । उनले जेन–जी विद्रोह पछिको विशिष्ट परिस्थितिमा राष्ट्रिय राजनीतिमा जुन रिक्तता देखियो त्यसलाई परिपूर्ति गर्नु र नेपाली जनताको आगामी राजनीतिक यात्राको दिशानिर्देश गर्नु, देश र नेपाली जनताप्रति उत्तरदायी पार्टी हुनुले नेपाल कम्युनिष्ट पार्टी (माओवादी)ले राष्ट्रिय राजनीतिको जिम्मेवारी वहन गर्नुपथ्र्यो । यसको परिपूर्तिका निम्ति पार्टीले कार्तिक २० गते काठमाडौँमा विशाल जनप्रदर्शन र जनसभा आयोजना गरी अपिल गरेको बताए ।

यसैगरी, प्रवक्ता प्रकाण्ड सीले देशको पछिल्लो राजनीतिक घटनाक्रम नियाल्दा झन अस्थिरता उन्मुख देखिएको तथ्य प्रस्तुत गर्दै जेन–जी विद्रोहको मर्म पुरा हुन् नसकेको बताए । उनले जेन–जी विद्रोहमार्फत आफ्नो मक्सद पुरा गर्न नसकेका देशी–विदेशी शक्ति पुन सलबलाउन थालेको बताए ।

प्रवक्ता प्रकाण्ड सीले जेन–जी विद्रोहपछि बनेको सुशीला कार्की नेतृत्वको सरकारले सही ढंगले कार्य अगाडि बढाउन नसकेको बताए । उनले भने– ‘जेन–जी विद्रोह पछि बनेको सुशीला कार्की नेतृत्वको सरकारले जसरी आफ्नो काम अगाडि बढाउनु पथ्र्यो, त्यो सकेको देखिँदैन ।’

यसैगरी, प्रवक्ता प्रकाण्ड सीले सरकारले जेन–जी विद्रोहको सारतत्व पक्रिन नसकेको बताउँदै यही कारणले देशको स्थिति झन्–झन् जटिल बन्दै गएको बताए । उनले अहिले देश भयङ्कर अन्योलतातर्फ उन्मुख भएको बताउँदै यस्तो अवस्थामा पार्टी र नेतृत्वले गम्भीर भएर सोच्नु पर्ने भन्दै सोही अनुरुप अगाडि बढ्न निर्देशन समेत दिए ।

यसैगरी, प्रवक्ता प्रकाण्ड सीले नयाँ कम्युनिष्ट केन्द्र निर्माण गर्नुको विकल्प नभएको बताए । उनले नेपलको क्रान्तिकारी कम्युनिष्ट आन्दोलनलाई एकतावद्ध गर्नुपर्ने ऐतिहासिक आवश्यकता र राष्ट्रको स्वाधिनतामाथि साम्राज्यवादी नाङ्गो हस्तक्षेप एवं दलाल पूँजीवादका विरुद्धको संघर्षका मोर्चाको वर्तमान आवश्यकतालाई आधार बनाएर नयाँ कम्युनिष्ट केन्द्र निर्माणको नीति अगाडी सारिएको र यो नयाँ विचार भएको बताए ।

प्रवक्ता प्रकाण्ड सीले सुशीला कार्की नेतृत्वको सरकार नै जेन–जी आन्दोलनको भावना, मर्म र उद्देश्य विपरीत गठन भएको र यो सरकारको जेन–जी विद्रोह पछिको विकराल अवस्थालाई सम्हाल्ने र समाधानको निम्ति ऐतिहासिक काम गर्ने ल्याकत नै नभएको बताए । उनले वर्तमान सरकारसँग दलाल पूँजीवादी राज्य र त्यसले राष्ट्र एवं नेपाली जनताको जीवनमा पैदा गरेका विपत्तको दीर्घकालीन समाधान दिने दृष्टिकोण, राजनीति कार्यक्रम र दूरदृष्टि नभएको बताउँदै यो सरकार साम्राज्यवादीहरुले निश्चित समयभित्र पूर्ति गर्ने स्वार्थ केन्द्रित कार्यबोझको चपेटामा परेको बताए । उनले चुनाव सम्पन्न गर्ने कार्य सुशीला कार्की नेतृत्वको सरकारको क्षमता भन्दा बाहिरको विषय भएको समेत बताए । उनले देशको वर्तमान राजनीतिक संकटका साथै जेन–जीको माग सम्बोधन गर्न सर्वपक्षीय अन्तरिम सरकार बनाउनुको विकल्प नभएकोसमेत बताए ।